HEBRU 2 - Laibaibal Thiang (BSI)

¹ Cucaah kan theihmi thil hna kha biapi ngaiah kan ruah awk a si, culoahcun tlau lakin kan tawlh sual lai.

² Zeitintiah vanmi hna hmangin chimmi bia hmanh fehter a rak si i bia a ngai lomi le nawl a buarmi hna cu fel tein lehrulh an si ahcun,

³ hi tluk in a nganmi khamhnâk hi zei rel loin kan um ahcun, zeitindah kan luat khawh lai? Cucu a hramthawk ah Bawipa nih a rak chim i a theitu hna nih kan sinah an fehter.

⁴ Pathian zong nih hmelchunhnâk le khuaruahharnâk, thilmak a phun phun hna le Amah duhning tein Thiang Thlarau laksawng he a hngalhpi hna.

⁵ Zeitintiah a um lai ding vawlei kan chimmi cu vanmi hna tangah a chia lo.

⁶ Asinain mi pakhat nih hmun pakhat ah hitihin a chim, “Minung hi zeidah a si i a zawn na ruah, Asiloah mi fapa zong hi zeidah a si i na zohkhenh tawn?

⁷ Anih cu vanmi nâk in niam deuh ah na ser i sunparnâk le upatnâk kha na chinh, na sermi hna cungah na umter.

⁸ A ke tangah zeizong vialte na chiah,” Zeitintiah a tangah zeizong vialte a chiah cang caah, a tangah chiah lomi zeihmanh a um lo. Asinain atu ah cun a tangah zeizong vialte a ummi bangin kan hmu rih lo.

⁹ Asinain Jesuh, vanmi nâk i niamdeuh i ser a si rihmi cu, Pathian zângfahnâk thawngin mi vialte caah thihnâk a tempiak khawh nâkhnga, thihnâk a tuarnâk thawngin sunparnâk le upatnâk chinhter in a um kha kan hmuh.

¹⁰ Zeitintiah Amah caah le Amah thawngin thil vialte hi an um i fapa tampi sunparnâk ah luhter in, a teminnâk thawngin an khamhnâk tuahpiaktu tlam tlinter cu Pathian caah tuahawk hrim a si ko.

¹¹ Zeitintiah Thiantertu le thiantermi hna cu an dih lakin mi pakhat ta an si. Cucaah annih cu, “Unau hna” tiah kawh awkah a zahpi hna lo.

¹² “Ka unau hna sinah na min ka aupi lai i â pummi hna lakah hlasa in kan thangṭhat lai,” tiin.

¹³ Cun “Amah ah ka zumhnâk ka chuan lai,” tiah a ti ṭhân. “Zohhmanh u, kei le Pathian pêkmi ngakchia hna hi,” tiah a ti ṭhân rih.

¹⁴ Zeicatiah ngakchia hna hi taksa le thisen cotu an si caah Amah zong nih an sining kha â hrawm ve, cucu thih ṭhawnnâk ngeitu Satan kha a thihnâk thawngin a hrawh khawh nâkhnga le,

¹⁵ an nun chung vialte thih`ihnâk saltang i a ummi hna kha a chuahter khawh nâkhnga caah a si.

¹⁶ A ngaingai ti ah, a bomhmi hna cu vanmi si loin Abraham tefa an si.

¹⁷ Cucaah minung hna caah sualngaihthiamnâk tuahpiak dingin, Pathian lei ah Tlângbawi Nganbik, velngeimi le zumhtlâk a si khawh nâkhnga zeizong kipah a unau hna bang i a run i can kha a ca zongah a herhmi a si.

¹⁸ Zeitintiah Amah hrimhrim nih turforhnâk tongin a rak tuar cang caah tukforhnâk a tongmi kha a bomh khawh hna.