HEBRU 13 - Laibaibal Thiang (BSI)

¹ Unau dawtnâk hi umpeng seh law.

² Ṭha te i khualtlung zohkhenh hi philhhlah u, cubantuk an philh lio cân ah cheukhat hna cu vancungmi nih an tlun tawn hna.

³ Thongtla hna kha a tla vemi bangin philhhna hlah u. Pumsa i a ummi nan si bangin serhsatmi hna zong kha, serhsatmi bangin philhhna hlah u.

⁴ Mi vialte sinah ṭhit-umh hi hmaizah siseh law, nuva ihkhun kha thûrter sihlah seh. Nupa sualnâk a tuahmi le ṭangdang kaimi cu Pathian nih bia a ceih hna lai.

⁵ Nan nunning cu hakkauhnâk tello nun siseh, nan ngeihmi ah lungtling u. Zeitintiah Amah hrimhrim nih, “Zeitikhmanhah kan kaltâk hna lai lo i kan zohsawh hna lai lo,” tiah a ti.

⁶ Cuticun ralṭha in, “BAWIPA cu aka bawmtu a si, ka ṭih lai lo. Minung nih zeidah anka tuah khawh lai? tiah kan ti.

⁷ Nan sin i Pathian bia a rak chimtu le nan hotu hna kha philh hna hlah u, an nunning kha i zohchunh u law, an zumhnâk kha zul hna u.

⁸ Jesuh Krih cu nizan, nihin, a zungzal in a hmun.

⁹ Cawnpiaknâk phunphun le zumhnâk phun dang dang i hruaiter hlah u. Lungthin hi zângfahnâk i fehter cu a ṭha, ei le din i fehter loin, cubantuk thil hna cu a buaipi tu hna zong nih an hlawkpi theng lo.

¹⁰ Kannih nih biakṭheng kan ngeihmi ah biakthlâm i rianṭuantu hna nih ei khawhnâk nawl an ngei lo!

¹¹ Tlângbawi Nganbik nih saram thisen cu hmunthiang ah sual raithawinâk caah a luhpi, a ruak tu cu haulengah an khangh tawn.

¹² Cubangin Jesuh zong nih, Amah thisen hrimhrim in mi a thianter khawh nâkhnga, hau lengah ah a rak tuar.

¹³ Cucaah Amah an zomh taihnâk cu phor in, haulenglei ah a sinah kal u sih.

¹⁴ Zeitintiah hika ah hin a hmunmi khua kan ngei lo, a ra laimi khua khi kan kawlmi cu a si.

¹⁵ Cucaah Amah thawngin thangṭhat raithawinâk hi Pathian sinah pechân lengmang u sih, cucu hmurkâ in a min kan ṭanhnâk theipar a si.

¹⁶ Asinain thilṭha tuah le nunsian hi phihhlah u. Cubantuk raithawinâk ah Pathian â lawm tawn.

¹⁷ Nan hotu le nawl ngai ulaw, an sinah i pe u, zeitintiah nan konglam chimtu le nan nunnâk kilvengtu an si. Ngaihchiat bu si loin lunglomhnâk he an chim khawh nâkhnga, zeitintiah cubantukin nan chimter hna ahcun nan caah a ṭha lai lo.

¹⁸ Kan caah thlacam u; a lamkip in hmaizahmi si hi kan i tim. Chiaṭha hngalhnâk ṭha in kan tuah tiah kan hngalh.

¹⁹ Nan sin i ka rak kir zau khawh nâkhnga, thla rakka cam piak cawlh dingin kan nawl hna.

²⁰ A liannganmi Tuukhal, kan Bawipa Jesuh thihnâk in thawhtertu, daihnâk Pathian nih a thisen i zungzal biakam thawngin,

²¹ A duhnâk tuah dingin rianṭha kipah tlam in tlinter hna seh, Jesuh Krih thawngin a mithmuh ah a lawmh tertu nih nanmah ah `uandih ko seh, Amah sinah zungzal in zungzal tiang sunparnâk kha um ko seh. Amen.

²² Cun unau hna, thapêknâk bia hi ṭha tein ngai dingin kan nawl hna, tawi tein ka rak ṭial ko hih.

²³ Kan unau pa Timote kha zalong tein an chuahter cang ti kha rak hngal ulaw, a rat zau ding a si ahcun amah he kan in hmuh hna lai.

²⁴ Nan hotu hna le mithiang vialte kha an kut ka tlaihpiak hna u. Itali rammi hna nih nan kut an in tlaihhna.

²⁵ Nan dihlak cungah zângfahnâk um ko seh. Amen.