HEBRU 12 - Laibaibal Thiang (BSI)

¹ Cuticun kannih zong, hi tlukin a liannganmi hngalhpitu bu nih minmei bangin ankan kulh caah kan thilrit hna le fawi tein a kan foih kho tu sualnâk kha hlonh hna u sih law, kan hmai i tlikzuamnâk a ummi ah inkhawhnâk he tli u sih,

² Jesuh kan zumhnâk hrampi le tlintertu lei khi zoh in tli u sih, Anih nih cun a hmai lei i chiahmi lawmhnâk ruangah ningzahnâk zeirel loin vailamtahnâk kha tuar in Pathian ṭhutdanh orhlei kamah a ṭhu.

³ Zeitintiah nan nunnâk kha thaba le zângder i a um sualnâk hnga lo, cubantuk i misual hna nih an ralchanhnâk le a temtuarnâk hna cu ruat tuah u.

⁴ Thisen chuak lakin sualnâk hi nan doh rih ṭung lo.

⁵ Fa le chimhhrin bangin chimhhrinnâk bia kha nan philh cang dah ra: “Ka fapa, BAWIPA chimhhrinnâk kha zeirel loin um hlah, sîk na si tikah na lungdong hlah seh.

⁶ BAWIPA nih a dawtmi kha a chimhhrin tawn i a lawmhmi fa kha a velh tawn.” timi hi.

⁷ Chimhhrinnâk nan tuar a si ahcun Pathian nih a fale bantukin an zoh hna tinâk a si, pa nih a chimhhrin lomi fa an um bal maw?

⁸ Fa nih a huahmi chimhhrinnâk nan huah lo ahcun fatak si loin lakfa nan si tinâk a si lai.

⁹ cuhlei ah kan ṭhatnâk dingah minung phungin pa le kan ngei, annih zong kan hmaizah hna. Cuhna nâkin a ngan deuhmi kan nun nâkhnga thlarau lei Pa nawl in kan um lai lo maw?

¹⁰ Zeitintiah annih nih cântawi te chung ṭha an ti ningin an kan chimhhrin tawn, Anih nih cun kan ṭhatnâk dingin le a thiannâk kan i hrawm khawh nâkhnga a kan chimhhrin tawn.

¹¹ Cun chimhhrinnâk hi in lio ah cun lawmhnâk leiin a lang kho lo, a fak taktak mi a si; asinain inkhawh hnu ah hnangamnâk theipar, dinnâk kha a chuahter.

¹² Cucaah kuat uaimi kha ṭhawnter hna ulaw, khuk dermi zong ṭhawnter hna u,

¹³ cuticun kebei mi kha tlu sawn loin damter an si nâkhnga, nan ke caah nan lam kha dinter hna u.

¹⁴ Mi vialte he i remnâk le thiannâk kha dawi u, cu thiannâk loin ahohmanh nih Bawipa an hmu lai lo.

¹⁵ I ralring u, Pathian zângfahnâk ah tling loin nan um sual lai. Khâtnâk hram a corhmi nih an buaiter hna lai, mi tampi nih thûrhnomhnâk ah an hman cang;

¹⁶ culoahcun, nupa sualnâk tuah hmangmi le Esau bangin Pathian upat lomi a um sual lai. Anih nih a fater sinâk kha rawl voikhat eiah a zuar.

¹⁷ Cuhnu ah thluachuahnâk cu coṭhân a duh hmanh ah cohlan piak a si ti lo i mitthli he kawl len hmanhsehlaw ngaihchinnâk cânrem a hmu ti lo ti kha nan theih.

¹⁸ Zeitintiah nannih cu tongh khawhmi tlâng, mei i kanghmi, khuadawm, khuamui, thli,

¹⁹ muko thawng le biachim thawng umnâk hmun a phânmi nan si lo, cu thawng theitu hna nih biadang an sin i chim ti lo ding tiangin an nawl.

²⁰ (Zeitintiah nawlpêkmi kha an tuar kho ti lo: “Cun saṭil hmanhnih tlâng kha a tongh ahcun thi lakin lung i cheh, asiloah feiin thi lak i chunh ding a si,”

²¹ An hmuhmi thil ṭih a nunning cu, Moses hmanh nih, “Ka ṭih tuk i a ka therh lengmang ko,” tiah a ti.)

²² Asinain nannih cu Zion tlâng, Pathian nung khualipi, van Jerusalem, relcawklo vanmi hna civuipi,

²³ fater van i min bunhmi kawhhran hna, mi vialte cung i biaceihtu Pathian, midik thlarau tlamtlintermi,

²⁴ Jesuh biakam thar lamkaltu, thisen theh, Abel thisen nâk in bia ṭha deuh chimtu hna sinah a phânmi nan si.

²⁵ I ralring u Biachimtu hi nan rak hlawtsual lai. Zeitintiah vawlei i Biachimtu an duh lo ruangah hremnâk in an luat khawh lo ahcun van in Biachimtu zei i kan rel lo sual ahcun kan luat lo chin chin lai,

²⁶ kha cân ah a aw nih vawlei hi a rak hninh; atu ah, “Vawlei lawng hmanh si loin, voikhat cu van zong ka hninh lai,” tiah bia a rak kam ṭhân.

²⁷ Cubangin voikhat cu, timi nih hin, hninhkhawh lomi lawng an hmun lai, hninh cangmi hna cu, sermi thil dang bantukin lo lak i ṭhial an si dih lai, tinâk a si.

²⁸ Cucaah hninhkhawh lomi ram a cotu kan si caah, zângfahnâk ngei u sih, cuthil ruangah Pathian ṭihzah buin Amah cohlan awktlâk in a rian kan ṭuan khawh lai.

²⁹ Zeitintiah kan Pathian hi kânghtu mei a si.