HEBRU 11 - Laibaibal Thiang (BSI)

¹ Zumhnâk hi ruahchanmi thil a um taktak tiah hngalhnâk, hmuh lomi thil hmuhfiannâk a si.

² Zeitintiah cu zumhnâk ruangah upa hna nih minṭhatnâk an rak co cang.

³ Vawlei hi Pathian bia in ser a si tiah kan hngalhnâk cu zumhnâk a si, cuticun hmuhkhawh mi hna hi a langkhomi i ser an si lo.

⁴ Zumhnâk in Âbel nih Kain nâkin raithawinâk ṭha deuh Pathian sinah a pêk, cunihcun miding a sinâk a langhter, a pêkmi cu Pathian nih a hngalhpi i cu thil nih a thih hnu tiangin bia a chim.

⁵ Zumhnâk in Enok kha thi loin lo lakin lâk a si i, “Pathian nih a lâk ruangah an hmu ti lo,” lâk a si hlanah Pathian lawmhtertu a si tiah hngalhpinâk a ngei.

⁶ Zumhnâk lo in Amah lawmhmi si khawh a si hrimhrim lo; Pathian sinah a rami nih, Amah cu a um ti kha a zumh hrimhrim lai i biatak chuah in a kawltu sinah laksawng petu a si ti kha a zumh awk a si.

⁷ Zumhnâk in Noa cu hmuh rih lomi thil kongah cung leiin ralrin pêk a si, Pathian ṭih buin a chungkhar khamhnâk caah tilawng a tuah, cu nih cun vawlei kha thiamlo a coter i zumhnâk ningin dinnâk ro cotu a si.

⁸ Zumhnâk in Abraham nih a co hngami hmun i kal dingah kawhnâk kha a pom. A kalnâk ding hmun hmanh hngal loin â thawh cawlh.

⁹ Zumhnâk in kamhmi ramah ramdangmi bangin a um i â lomi biakam copitu Isaak le Jakob hna he puanthlâm chungah an um,

¹⁰ zeitintiah Pathian hrimhrim nih a dirh i a sakmi le hrambunhmi khualipi kha a hngah.

¹¹ Zumhnâk in Sarah zong nih biakamtu zumhtlâk sinâk kha a zumh ngam ruangah tar a si hnu ah fa pawi dingin ṭhawnnâk a co i fa a hrin.

¹² Cucaah mi pakhat, mithi bang a si cangmi sinin van arfi bangin a tammi le rihli kam i relcawk lo these zat bantukin tampi an rak chuak.

¹³ Cuhna cu an dihlak in zumhnâk ngei in an thi i biakammi thil tu cu an co manh lo, asinain lamhla pi in an rak hmuh chung cang, lungdai tein an rak i lawmhpi i vawlei ah hin khual le ramdangmi bantuk an si kha an rak hngalhter cang.

¹⁴ Zeitintiah cubantuk an chimmi nih anmah ca i ram a kawlmi an si kha a langhter.

¹⁵ Cun an rak chuahnâk ram nih an lung lenter hna sehlaw kirṭhân dingah cânrem zong an ngei ko lai.

¹⁶ Asinain an duhmi cu ram ṭha deuhmi a si i cucu vanram a si. Cucaah Pathian nih an Pathian si a ning a zak lo i an caah khualipi a rak timhtuah piak hna.

¹⁷ Zumhnâk in Abraham cu hniksak a si lio ah khan, Isaak kha a pêk, biakamnâk a hmutu nih a fapa ngeihchun kha a pêk;

¹⁸ “Isaak ah hin na tefa tiah kawh an si lai” tiah a rak chim cang.

¹⁹ Pathian nih mithi zong a thawhter khawh ko tiah bia tlâng a komh i thih nâkin a nung ṭhanmi bangin a hmuh ṭhân tak tak.

²⁰ Zumhnâk in Isaak nih a ra laimi thil kongah Jokob le Esau kha thluachuah a pêk hna.

²¹ Zumhnâk in Jakob nih a thih laiah Josef fale cu thluachuah a pêk hna i a ṭhiangṭhunh zim hngatchan in Pathian a biak.

²² Zumhnâk in Josef nih khan a thih cân a naih tikah, Israel hna an chuahnâk ding kong a chimchung i a ruh kong i an tuah hngami tiang a chimh chung hna.

²³ Zumhnâk in Moses a rak chuah lio ah khan, â dawh ngaimi nau te a si caah, bawi nawlpêk hmanh ṭih loin, thlathum chung a nu le pa nih an thuh.

²⁴ Zumhnâk in Moses kha a upat tikah, Faraw fanu fapa ah um a duh lo;

²⁵ a lo ṭhân ding sualnomhnâk chungah um duh loin Pathian mi hna he fahnâk tuar kha â thim deuh.

²⁶ Krih ruang i minchiatnâk cu Ezip ram i rumnâk nâkin chawva sunglawi deuh ah a ruah i a hmuh hngami laksawng kha a conh peng caah.

²⁷ Zumhnâk in bawi thinhun lai zong ṭih loin Ezip ram cu a chuahtâk i hmuh khawh lo cu ahmuh ruangah lungsau in a in ko.

²⁸ Zumhnâk in lanhtâk Thô le thisen theh kha hram a thawk piak hna i hrawktu nih khan an fater a tongh ve nâkhnga lo.

²⁹ Zumhnâk in Rihli sen kha tlângcung kal bangin an tan i Ezip mi hna nih kalve an timh i ti nih a khuh dih hna.

³⁰ Zumhnâk in Jeriko khua kulhnâk kha ni sarih an vel hnu ah a cim.

³¹ Zumhnâk in Rahab hlawhhlâng nu kha ngiathlaitu hna ṭha tein a rak zohkhenh hna caah zumlotu hna lakah a thi ve lo.

³² Zeidah kan chim rih lai? Gidion le, Barak le, Samson le, Jeptha le, David le, Samuel le Profet hna kong kha chim ninglaw, cân nih a kan zo lai lo;

³³ cu hna nih zumhnâk in ram an lâk i dinnâk an tuah, biakammi kha an co i chiandeih kâ zong an phih,

³⁴ ṭih a nungmi mei alh an mihter i a hârmi vainam in an luat, derthawm nâkin ṭhawnter an si, raldohnâk ah mi ralṭha an si i ramdang ralkap kha an zâmter hna.

³⁵ Nuhna nih an mithi thoṭhân an hmuh, Midang nih tukthah an tong, thawhṭhânnâk ṭha chin an co khawh nâkhnga luatnâk zong an kawl duh lo.

³⁶ Cheukhat nih mi nisawh le sikvelh an tuar, asi, thongchung ah hrengkhenh in an um.

³⁷ Lungin an cheh hna, hluahin an tan hna, tukforhnâk an ton i vainam in thah an si. Tuphaw le meheh phaw i hruk in an vakvai, sifak ngai le, har ngai in, diriam ngaiin an rak serhsat hna -

³⁸ cu hna caah cun vawlei hi umnâk tlâk a si lo. Ramcar le tlangcung le, lungkua le khor chung hna ah an um tawn.

³⁹ Cuticun cu vialte hna nih zumhnâk thawngin thangṭhat an rak co i biakam mi tu cu an rak co rih lo.

⁴⁰ Pathian nih annih le kannih â ruang tein tlamtlinter i kan um khawh nâkhnga, a ṭha chinmi thil a kan ruah piak caah a si.