HEBRU 10 - Laibaibal Thiang (BSI)

¹ Zeitintiah nawlbia cu a um laimi thilṭha hna muithlâm a si i cu thil hna muisam taktak cu a si lo. Cucaah kum fatin a phung bangin an pêk chanhmi raithawinâk nih a pe chantu hmanh tlam a tlinter kho hna lo.

² Cutin sihlahsehlaw, a biatu hna voikhatah thianter an si lai i sual hngalhnâk an ngeih ti lo ahcun pekchanhnâk cu an ngol diam cang lai lo maw?

³ Asinain cu raithawinâk hna cu kumchiar te an sualnâk hngalhter ṭhântu a si.

⁴ Zeitintiah cawpa le meheh thisen nih sualnâk a lohter kho lo.

⁵ Cucaah vawlei i arat lio ah khan, “Raithawinâk le thilpêk na duh lo, cucaah pum kha ka caah naka timhlamh piak.

⁶ Khangh thawinâk le sual ca i pêkchanhmi ah nâ lawm fawn lo.

⁷ Cuticun hi ti hin ka chim, ‘Maw, Pathian ngaihmanh cauk chungah ka kong ṭialmi bangin, na duhnâk tuah awk ah ka ra,” tiah a ti.

⁸ Ahmasaah, “Raithawinâk le thilpêk, khanghthawinâk le, sualthawinâk hna na duh lo i cuka ah cun nâ lawm fawn lo,” tiah a ti. (cu hna cu nawlbia ning i tuahmi an si)

⁹ Cutikah, “Maw Pathian, ngaihmanh, na duhmi tuah awkah ka ra cang,” tiah a rak ti. A pahnihnâk hi a fehter khawh nâkhnga, a pakhatnâk kha a hloh.

¹⁰ Cu duhnâk in Jesuh Krih taksa voikhat ah zungzal ca pêkchanhnâk thawngin thianter kan si cang.

¹¹ Tlângbawi hna cu nichiar tein sualnâk a la kho lomi thawinâk tuah in an dir lengmang ko.

¹² Asinain Anih nih cun zungzal caah sual thawinâk voikhat lawng a tuah hnu ah Pathian orhlei kam ah a ṭhu;

¹³ cu cân thawk in a ral pawl a ke tang i a chiah hlan lo a hngah ko.

¹⁴ Zeitintiah voi khat raithawinâk nih thianter lengmangmi hna cu zungzal ca in a tlinter cang hna.

¹⁵ Thiang Thlarau zong nih a kan hngalhpi i hibangin a rak chim cang.

¹⁶ “Cu ni hna hnu ah, an sin i bia ka kam ding cu hi bangin a si lai tiah, BAWIPA nih a ti. An lungthin ah ka nawlbia ka chiah lai i an ruahnâk chungah ka ṭial lai,”

¹⁷ “An sualnâk le nawlbuarnâk zong kâ cinken ti lai lo,” tiin.

¹⁸ Cubangin sual ngaihthiamnâk a umnâk hmunah sualthawinâk a um lengmang a herh ti lo.

¹⁹ Cucaah unau hna, Jesuh thisen thawngin hmunthiang bik i luhnâk dingah ralṭhatnâk kan ngei,

²⁰ A taksa lanin onmi puanzar kha kan caah a kan ruah piakmi lam thar le a nungmi lam cu a si,

²¹ cun Pathian chungkhar ah Tlângbawi Nganbik kan ngeih caah,

²² lung taktak le zumhnâk i hngalhfiannâk ngeiin, kan lungthin i a thûrmi chiaṭha hngalhnâk hna kha thian terin kan taksa zong a thiangmi ti ah i kholh in Amah cu naih u sih.

²³ Kan i ruahchanmi zumhnâk hi â hninhlonâk dingah fek tein i tlai u sih, zeitintiah Biakamtu cu zumhtlâk a si.

²⁴ Cun dawtnâk le thilṭha tuahnâk in i tharthawh dingin ruat cio u sih.

²⁵ Cheukhat nih an ngol bangin, hmunkhat te ah i pumh lengmang hi ngol hlah usih, Ni cu a naih chin lengmang bangin i forhchin lengmang in pakhat le pakhat nan lung thawhter i zuam u.

²⁶ Zeitintiah biatak hngalhnâk kan co hnu i hrâmhrâm i kan sual lengmang ko ahcun sualnâk caah raithawinâk a um ti lai lo,

²⁷ a phân laimi biaceihnâk ṭihnung, A ral hna khangtu ding thinhunnâk mei lawng an hngahmi cu a si.

²⁸ Moses nawlbia buartu hna cu hngalhpitu pahnih pathum bia in zângfahnâk tel loin an thi tawn.

²⁹ Pathian Fapa a lamh chih i amah thiantertu biakam thisen a sawhsawh in a ruat i zângfahnâk Thlarau a cawhdehtu cu zeitluk a fakmi hremnâk dah tuar awktlâk ah nan ruah?

³⁰ “Zeitintiah phuhlam cu Keimah ta a si, Keimah nih ka lehrul lai, ti le, BAWIPA nih a mi le hna cu bia a ceih lai,” titu cu Mi zei a si kha kan hngalh.

³¹ A nungmi Pathian kut i tluk cu ṭih a nung tak takmi a si.

³² Hlan i ceunâk nan rak hmuh hnu i temtuarnâk le buainâk nganpi nan tuarmi kha ruat ṭhân hmanh u,

³³ cân khat khat cu minung hna conh awkah zomhtaih le harnâk chungah nan um, cân dangah cubantuk i tuahmi hna tuarpinâk ah nan um,

³⁴ zeitintiah ka cikcin ruangah nanka zângfah i nan thil an lâk zongah lunglawm tein nan in khawh, vanah a ṭha chinmi chawva zungzal a uhmi nan ngeih kha nan hngalh.

³⁵ Cucaah a liannganmi ṭuanman a ngeimi, nan zumhfehnâk kha hlawnh hrimhrim hlah u.

³⁶ Zeitintiah Pathian duhnâk nan tuah hnu i a kamhmi nan co khawh nâkhnga inkhawhnâk nan herh.

³⁷ Zeitintiah a rauh hlan ah ara dingmi cu ara lai, a rau lai lo.

³⁸ Ka miding cu zumhnâk in a nung lai. Hnulei a tawlh ahcun a cungah kâ lawm lai lo.

³⁹ Kannih cu lotlau dingin hnu leiah a tawlhmi kan si lo i nunnâk khamh dingin zumhnâk ngeitu kan si.