HEBRU 1 - Laibaibal Thiang (BSI)

¹ Pathian, hlan lio ah cân dang dangah phun dang dangin hringtu hna sinah profet hna hmangin bia a rak chimtu nih khan,

² hi ni hmadung ah a Fapa in kan sinah bia a chim cang, Amah cu thil vialte rocotu ah a ruah i Amah hmangin vawlei hi ser a si.

³ Amah hi a sunparnâk ceu cu a si i Mi a sinâk kokek taktak langhtertu a si, a bia ṭhawnnâk nih zeizong vialte hi a tlaih i kan sualnâk kha Amah hrimhrim nih a thianter hnu ah Cungnung bik orhlei kamah a ṭhu.

⁴ Vanmi hna nâkin a ṭha deuhmi ah a cang, anmah nâk i a cungnung deuhmi min rocotu sinâk kha a co.

⁵ Zeitintiah vanmi ahosinahdah hi bia hi a chim bal? “Nang cu ka Fapa na si, Nihin ah kan hrin?” ti le, “Keimah cu Amah caah Pa ka si lai i Amah cu ka caah Fapa a si lai,” timi hi.

⁶ Asinain a fater vawlei i a ratpi ṭhân tikah, “Pathian vancungmi vialte nih Amah cu bia hna seh,” tiah a ti.

⁷ Cun vanmi hna kongah, “Amah nih a vanmi hna cu thlarau ah a canter hna i a rian ṭuntu zong meialh ah a canter tawn hna,” tiin.

⁸ Asinain Fapa sinah hitinhin a chim, “Maw Pathian na bawi`hunhdanh cu, zungzal in zungzal ca a si. Dinnâk ṭhiangṭhunh zong na pennâk ṭhiangṭhunh a si.

⁹ Dinnâk kha na dawt i nawlbuarnâk kha na huat. Cucaah Pathian, na Pathian nih na hawi le hna nâkin lawmhnâk sathau cu an thuh,” tiin.

¹⁰ “Nang, BAWIPA, a hramthawk in vawlei hram na bunh cang i van khi na kut chuak an si.

¹¹ An rawk dih lai nain Nang cu na hmun lai: Cuvialte cu thilthuam bangin an hlun dih te lai:

¹² Puan bangin na zual lai i an i thleng dih lai, Nangtu cu na hmun zungzal i nâkum zong a dongh lai lo,” tiin.

¹³ Asinain vanmi ahosin bik ahdah hihi a chim bal? “Na ral hna na ke chiahnâk i ka canter hlan pauh cu ka orhlei ah ṭhu,” tiin.

¹⁴ An dihlak in rianṭuantu thlarau, khamhnâk ro a co hngami zohkhenhtu ah thlah an si lo maw?