GALATI 6 - Laibaibal Thiang (BSI)

¹ Unau hna, mi pakhat cu sual nih a tlaih tikah, nannih thlarau mi hna nih nunnemnâk in an sinâkhmasa ah siter ṭhân va zuam ulaw, tukforhnâk nan ton sualnâk hnga lo ralrinnâk tu ah hmang u.

² Pakhat le pakhat nan thilrit i châng u law Krih nawlbia nan tlinter a si lai.

³ Zeitintiah zeihmanh siṭung loin biapi ngai i â ruatmi cu amah le amah â hlengmi a si.

⁴ Asinain mikip nih mahle rian cio zohfiang hna sehlaw hawi he um loin, amah lawng a um zongah â lawm peng ko lai.

⁵ Zeitintiah mikip nih mahle thil cio an phorh te ko lai.

⁶ Bia cawnpiak a simi nih cawnpiaktu sinah a ngeihmi thilṭha vialte hrawm ve seh.

⁷ Hlen in um hlah u, Pathian cu nihsawh ding a si lo. Mi nih a tuhmi thlaici bangin a zûn te ko lai.

⁸ Thisa lei in a tuhtu nih thisa chungin rawhnâk a zûn lai, Thlarau lei i tuhtu nih Thlarau sinin zungzal nunnâk a zûn te lai.

⁹ Cuticun thilṭha tuah neng hlah u sih. Kan i thlahdorh lo ahcun a cân te ah kan zûn te ko lai.

¹⁰ Cucaah cân rem kan ngeih ning cio in, mi vialte cungah thilṭha tuah u sih, a hleiin zumhnâk i kan chung le sinah tuah u sih.

¹¹ Zohhmanh u, keimah kut hrimhrim in nan sinah cafang ngan pipi in ka ṭial.

¹² Mihmuh i zohdawh si a duhmi nih cuarpartan an in fial hna. Hihi zeidang ruangah a si lo. Krih vailam ruang i serhsatnâk in luat an duh caah a si.

¹³ Zeitintiah cuarpartanmi zong nih nawlbia cu an zul hlei ṭung lo, nanpum cungah hmaihngal pi ding ngeih an duh ruangah cuarpartan an in fial hna.

¹⁴ Kan Bawipa Jesuh Krih vailam dah ti lo cu Pathian nih hmaihngal pi a ka sianglo, cu thawng cun vawlei hi ka caah khenhchih a si i kei zong vawlei caah khenh chih ka si ve.

¹⁵ Krih Jesuh ah cun cuarpartan hi zeihmanh san a tlai lo i cuarpartan lo zong zeihmanh san a tlai hlei lo. San a tlaimi cu sertharnâk hi a si.

¹⁶ Cun hi phung ningin a kalmi hna sinah daihnâk le zângfahnâk an cungah um ko seh, cun Pathian Israel hna cung zongah um ko seh.

¹⁷ Atu thawkin ahohmanh nih hna ka hnawh ti hna hlah seh, zeitintiah Bawipa Jesuh chinchiahnâk cu ka pum cungah hin kâ put cang.

¹⁸ Ule nau hna, Bawipa Jesuh Krih zângfahnâk nan thlarau sinah um ko seh. Amen.