GALATI 5 - Laibaibal Thiang (BSI)

¹ Cucaah Krih nih akan pêkmi zalonnâkah fek tein dir ulaw, sal hngawngkual ah tângti hlah u.

² A ngaingai ti ahcun, keimah Paul nih, nan sinah ka chim, cuarpar nan tan ahcun Krih nih zeihmanh an ṭhathnem hna lai lo.

³ Cuarpar â tanmi hna cu nawlbia vialte zulh awkah leiba â sertu an si, tiah ka hngalhter ṭhân hna.

⁴ Nannih nawlbia in thiamco â timmi hna, Krih he nan i ṭhen cang, zângfahnâk in nan tlu cang.

⁵ Kannih nih Thlarau thawngin zumhnâk i dinnâk kha ruahchannâk he hngahhlang ngaiin kan hngak.

⁶ Zeitintiah Krih Jesuh ah cun cuarpartan hi zeihmanh a ṭhahnem lo, cuarpar tanlo zong zeihmanh a ṭhahnem hlei lo. Zumhnâk, dawtnâk i ṭuan lawng kha a ṭhahnemmi cu a si.

⁷ Ṭha tein nan tli. Ahonihdah biatak zulh nâkin an kham hna?

⁸ Hibantuk i an tukforhtu hna hi nanmah kotu sinin a si lo.

⁹ Thilnu tlawmte nih changreu cu a dih lakin a thawhter tawn.

¹⁰ Ruahnâk dang nanngei lailo tiah Bawipa ah ka zumh, an buaitertu hna cu ahoansihmanh ah biaceihnâk cu an in ko lai.

¹¹ Unau hna, keinih cuarpar tannâk kong ka chim ahcun, zeiruangahdah serhset ka si ko rih? Cutinsisehlaw vailam i tluknâk hi a dih diam cang hnga.

¹² An buaitertu hna cu fing tein i tan lawlaw hna sehlaw ka hei duh dah.

¹³ Ule nau hna, zalong ding i kawhmi nan si, nan zalonâk tu cu thisa caah cânremah hmang hlah u, dawtnâk in rian i ṭuanpiak cio u.

¹⁴ Zeitintiah “Nangmah nâdawt bangin na innpa na dawt lai” timi biafang khat nih Nawlbia vialte a tlinter dih.

¹⁵ Asinain nan i seh i nan i ei ahcun, nan i hrawk dih te lai, i ral ring u.

¹⁶ Cuticun hihi ka chim: Thisa duhnâk nan tlinter nâkhnga lo Thlarau ah um u.

¹⁷ Zeitintiah thisa duhnâk nih Thlarau a ralchanh i Thlarau zong nih thisa a ralchanh. Cuticun tuah nanduh mi nan tuah khawhlonâk cu hi hna pahnih ralchanh ruangah a si.

¹⁸ Asinain Thlarau hruai i nan um ahcun, nawlbia tangah nan um ti lo.

¹⁹ Thisa duhnâk hna cu a fiang ko, cuhna cu, ṭangdangkainâk, nupa sualnâk, thurhnawmhnâk, hornâk,

²⁰ milem biaknâk, doihthiamnâk, huatnâk, i siknâk, hnahchuahnâk, thinhunnâk, mahzawn lawng ruahnâk, lungruallonâk, zumhnâk dang ngeihnâk,

²¹ hnahchuahnâk, lainawnnâk, zuritnâk, zuhmun nuamtinâk hna an si. Cubantuk thil tuah a hmangmi hna nih Pathian pennâk an co lai lo, tiah kan chimh chung hna bang khan, atu zongah ka chim ṭhân.

²² Thlarau theitlai tu cu, dawtnâk, lawmhnâk, daihnâk, lungsaunâk, zângfahnâk, ṭhatnâk, zumhawktlaksinâk,

²³ toidornâk le i sumkhawhnâk an si, cu thil hna ralchanh in nawlbia zeihmanh a um lo.

²⁴ Cun Krih Jesuh ta a simi hna nih an thisa cu a duhnâk le tlaihchannâk hna he an khenhchih cang.

²⁵ Thlarau ah kan nun ahcun, Thlarau zongah kal u sih.

²⁶ Mah le mah i hlawrh le thin i hunter le hnahchuahnâk ngeiin um hlah u sih.