GALATI 4 - Laibaibal Thiang (BSI)

¹ Hitihin ka chim, ro cotu cu zeizong vialte cungah hotu sihmanhsehlaw, ngakchia a si chung pauh cu sal he an i thleidang lo,

² a pa ruahmi cân a phâk hlan lo cu zohkhenhtu tangah a um ko rih.

³ Cubantukin kannih zong ngakchia kan si lio ah, vawlei cawnpiaknâk hram tangah sal in kan rak um.

⁴ Asinain a tlingmi cân a phâk tikah, Pathian nih a Fapa cu a run thlah, nu hrin nâkin, nawlbia tangah a rak chuak,

⁵ cucu nawlbia tang i a ummi kha tlanh awk le, fa sinâk kan co khawh nâkhnga caah a si.

⁶ Fa nan si caah, Pathian nih a Fapa Thlarau cu nan lungthin ah a run thlah i, “Abba, Ka Pa,” tiin a au.

⁷ Cucaah sal nan si tilo fa nan si cang, cun fa nan si ahcun Krih thawngin Pathian ro cotu nan si.

⁸ Asinain Pathian nan rak hngalh lo cân ah khan an kokek hrim hrimah pathian a si lomi hna rian nan rak ṭuan tak tak.

⁹ Atu Pathian nan hngalh hnu ah, asiloah, Pathian hngalhmi nan si hnu ah tiawk a si deuh, zeitindah san a tlai lomi cawnpiaknâk hramah i mer in cu sal i um cu nan duh ṭhân khawh rih?

¹⁰ Ni le thla, cân le kum hna nan ulh ṭhânmi hi.

¹¹ Nan caah thazâng ka chuahmi pakpalawng a si sual lai kha ka phâng ko.

¹² Unau hna keimah bantuk si dingin kan nawl hna, keizong nanmah bantukin ka um. Fahnâk nanka pe hrimhrim lo.

¹³ Thawngṭha nan sin i ka chim hmasat tan ah khan ka taksa derthawm tuk ruangah a si kha nan hngalh.

¹⁴ Ka taksa cung i hneksaknâk a ummi kha nan zomhtaih lo i nan hlaw fawn lo. Pathian vanmi hna le, Jesuh Krih bantukin nanka cohlan kha.

¹⁵ Vanṭha nan i tinâk vialte kha zeitindah a um kun? Sikhosehlaw nan mitmu hmanh coih i pêk nanka duh ti kha ka philh lo.

¹⁶ Biatak kan chimh hna ruangah nan ral ah ka cang maw?

¹⁷ Ṭhahnem ngai ngaiin nanmah lemsawi an timtu hna kha nan ṭhatnâk ding an duh ruangah a si lo, anmah lei nan hoih i a dang tein lâk an in duh hna ruangah a si.

¹⁸ Thilṭha tuah dingah, nan sin ka um lio lawng si loin zeitik cân pauhah ṭhahnem nan ngaih awk a si.

¹⁹ Ka unau hna, nan lakah Krih muisam langhhter a si hlan pauh cu nau nganfah bangin nan caah ka ngan a fâk.

²⁰ Atu lio hna ah hin nan sin i um i ka aw thlen ka duh ngai ngai, nan kongah ka lung a hring.

²¹ Nawlbia tang i um a duhmi hna ka chim tuah u, nawlbia cu nan thei bal lo maw?

²² Hitihin ṭial a si. Abraham nih fapa pahnih a ngei, pakhat cu salnu sin in, a dang pakhat cu zalongnu sin in.

²³ Asinain salnu sin in a chuakmi cu thisa phungin a chuak i zalongnu sin in a chuakmi cu biakammi ruang i a chuakmi a si.

²⁴ Cu bia cu zohchunh ding a si. Zeitintiah cucu biakam pahnih an si. Pakhat cu Sinai tlang, sal siding i fahringtu Hagar a si.

²⁵ Cuticun Hagar hi Arabia ram i Sinai tlâng a si i atu lio Jerusalem sining he â khatmi a si, a fa le he salah an um.

²⁶ Asinain cunglei Jerusalem tu cu zalongmi a si i cucu kan nih vialte nu a si.

²⁷ Hitihin ṭial a si, “Maw, nang, a cingmi, Fa ngeilo nu i lawm tuah. Nang nau nganfah a tuar bal lomi, au tuah. Va ngeimi nu nâkin lileng nu nih fa tamdeuh a ngei.”

²⁸ Unau hna, kan nih hi Isak bangin biakam fale kan si.

²⁹ Asinain thisa phung i a chuakmi nih khan, Thlarau phung i a chuakmi a serhsat bantukin, atu zongah cubantuk a si.

³⁰ Asinain Cathiang nih zeitindah a chim? “Salnu cu a fale he ṭhawl hna u; zeitintiah salnu fapa nih zalong nu fa kha ro a copi kho lai lo,” tiah a ti.

³¹ Cuticun unau hna, salnu fale kan si lo, zalong nu fale kan si.