GALATI 3 - Laibaibal Thiang (BSI)

¹ Maw Galati mihrut hna! Biatak zumlo dingah ahonihdah an in doih hna? Jesuh Krih cu nan mithmuh hrimhrim ah fiang tein khenhchih a sinâk cu langhter a si lo mei?

² Hi lawng hi nansin in hngalh ka duh. Thlarau nan comi kha nawlbia nan tuah ruangah maw nan co, zumhnâk bia nan theih ruangah dah?

³ Hi tluk in maw nan hruh cang? Thlarau in nan thawk i pumsa in tlinter nan timh maw?

⁴ Pakpalawng a si taktak ahcun, thil vialte kha pakpalawng in maw nan in kun lai?

⁵ Nansin i Thlarau an petu le khuaruahharnâk a tuahtu nih khan, nawlbia tuahsernâk in maw an pêk hna zumhnâk bia nan theih ruangah dah?

⁶ “Abraham nih Pathian a zumh, cucu a dinnâk ah ruahpiak a si bangin.”

⁷ Zumhnâk i a ummi lawnglawng Abraham fa an si, ti kha hngal ko u.

⁸ Cathiang nih a hmuh chungmi cu, zumhnâk thawngin Pathiannih Gentel mi hna thiam a coh lainâk hi a si, “Nangmah ah miphun vialte thluachuah an si lai,” tiin Abraham sinah hi thawngṭha hi chim a rak si cang.

⁹ Cuticun zumhnâk i a ummi hna kha, zumtu Abraham he thluachuah an si.

¹⁰ Zeitintiah Nawlbia tuahsernâk tang i a ummi hna cu chiatserhnâk tangah an um; zeitintiah Nawlbia cauk chung i ṭialmi vialte a tuah peng lomi hna cu chiatserh si ko seh, tiah ṭial a si.

¹¹ Asinain Pathian mithmuh ah nawlbia tuahsernâk in thiam a comi an um lo, ti cu a fiang “Zeitintiah miding cu, zumhnâk in a nung lai,” tiah ṭial a si.

¹² Cuhleiah Nawlbia cu zumhnâk he â tlai lo, “Cubantukin a tuah ahcun, a tuah ningin a nung lai,” ti a si.

¹³ Krih cu kan ai awh-in chiatserh a si i nawlbia chiatserhnâk chungin a kan tlanh cang (zeitintiah thingkung cungah thlaimi pauh cu chiatserhmi an si,” tiah ṭial a rak si,)

¹⁴ cuticun Abraham sin i thluachuahnâk cu Krih Jesuh thawngin Gentel mi hna cungah a um kho lai, cuticun zumhnâk thawngin kamhmi Thlarau kha kan hmuh khawh lai.

¹⁵ Unau hna, minung phungin ka chim. minung biakam zong sihmanhsehlaw, fehter cangmi cu an phoih ballo i an chap bal fawn lo.

¹⁶ Cuticun Abraham le a tefa sinah bia cu kamh a rak si. Mi tampi sin chim bangin, na tefa hna sinah, a ti lo i mi pakhat sawh in, na tefa sinah, ti a si, cucu Krih hi a si.

¹⁷ Cun hitihin ka ti, Biakam, Pathian nih Krih ah a fehtermi cu, nawlbia kum 430 hnu i a ummi nih khan zeihmanh loah canter in a hrawk kho lo.

¹⁸ Zeitintiah ro cotu cu nawlbia tuahsernâk ruang i coter a si ahcun biakam ruangah a si kho ti lo. Pathian nih ro cotu ding cu biakam in Abraham sinah a pêkmi a si.

¹⁹ Cutiasiahcun nawlbia hi zeidah a um chan? Nawlbuarnâk ruangah tefa a rak langh hlan i biakammi chaptu ah pêk a si; cucu vanmi remnâk lamkaltu hna hmangin pêk a si.

²⁰ Lamkaltu hi mi pakhat sinah lamkal an sibal lo. Pathian tu cu pakhat a si.

²¹ Nawlbia nih Pathian biakam cu a ralchanh maw? Ralchanh naisai hlah. Nuntertu nawlbia hi pêk rak si cang sehlaw, dinnâk zong nawlbia thawngin a um tak tak awk a si.

²² Asinain Jesuh Krih zumh ruang i biakammi cu a zumtu hna sin i pêk a si khawh nâkhnga, Cathiang nih zeizong vialte hi sual nawlngeihnâk tangah a hrenh dih hna, tiah a ti.

²³ Asinain zumhnâk a rak phâk hlan i zumh hngami cu langhter a si hlan ah khan nawlbia tangah kilven kan rak si.

²⁴ Cuticun zumhnâk thawgin thiam kan co khawh nâkhnga nawlbia cu Krih lei ah a kan hruaitu a si.

²⁵ Asinain zumhnâk a rak phâk hnu ah cun hruaitu tangah kan um ti lo.

²⁶ Zeitintiah Krih Jesuh zumhnâk thawngin Pathian fale nan si dih cang.

²⁷ Zeitintiah nan lakah Krih chungah baptisma a ingmi vialte cu Krih in nan i thuam cang.

²⁸ Cuka ah Judah siseh, Grik siseh um khawh a si lo. Cuka ah sal siseh, miluat siseh um khawh a si lo, pa le nu zong an um kho hlei lo. Krih Jesuh ah nan dik lakin pumkhat nan si.

²⁹ Cun Krih ta nan si ahcun, Abraham tefa nan si i biakammi bangin ro cotu nan si.