GALATI 1 - Laibaibal Thiang (BSI)

¹ Paul, Lamkaltu (minung hna thlahmi si loin, minung thawng zong si loin, Jesuh Krih le thihnâk in a thawhtertu, Pathian thawngin) le,

² Ka sin i a ummi unau vialte nih, Galatih ram i kawhhran hna sinah:

³ Pa Pathian leh kan Bawipa Jesuh Krih sinin zângfahnâk le daihnâk um ko seh,

⁴ Atu chan chan ṭhalo chungin a kan khamh khawh nâkhnga, kan Pathian le kan Pa duh ningin, Amah cu kan sualnak ruangah â pe,

⁵ Amah sinah sunparnâk zungzal in um ko seh. Amen.

⁶ Krih zângfahnâk i an kotu hna kha mer takin, cutluk rang i thawngṭha dang nan zuanmi cu ka khuaruah a har ko.

⁷ Cucu Thawngṭha a si lo; nanmah buai terin Krih Thawngṭha merh a timmi an si.

⁸ Asinain, kanmah siseh, van i vancungmi siseh, kan in chimhmi hna hleiin, thawg`ha dang an chim ahcun chiatserh in um seh.

⁹ Ka chim cang bang khan, ka chim ṭhân rih lai. “Nan cohlan cangmi dah ti lo cu, thawngṭha dang an chim ahcun, chiatserh in um ko seh.

¹⁰ Minung lêmsoi maw ka timh Pathian dah? Asiloah, minung lawmhter maw ka timh? Minung lawmhtertu ka si ahcun Krih sal ka si lai lo.

¹¹ Ule nau hna kan chimhmi hna thawngṭha kha minung bia a si lo tiah kan hngalhter hna.

¹² Zeitintiah minung sinin ka hmuhmi a si lo i mi nih anka cawnpiakmi zong a si lo. Jesuh Krih â langhnâk in ka hmuhmi a si.

¹³ Zeitintiah Judah biaknâk ah hmasa ka nuncan kha nan hngalh ko. Kha tluk in Pathian kawhhran ka serhsat ning le hrawh kâ zuamning kha.

¹⁴ Judah biaknâk ah ka ṭhirual le ka phunhawi hna ka chawhkanh hna i pupa hna phung ka ṭanhnâk ah a hleihluat in â zuammi ka si.

¹⁵ Asinain Pathian duhningin, ka nu paw chungin aka thleidangtu le a zângfah nâkin a ka kotu nih,

¹⁶ Gentel mi hna sinah a kong ka phuan khawh nâkhnga a Fapa cu ka sinah a langhter lio ah khan titsa le thisen sinah ruahnâk ka hal lo,

¹⁷ Lamkaltu ka si hlan i lamkaltu a rak simi umnâk Jerusalem zongah kal loin, Arabia ram tu ah ka kal i Damaska ah ka kir ṭhân.

¹⁸ Kum thum hnuah Peter hmu dingin Jerusalem ah ka kal i a sinah ni hlei nga ka câm.

¹⁹ Lamkaltu dang cu Bawipa unau Jeim dah tilo ahohmanh ka hmu hna lo.

²⁰ (Nan sin i ka ṭialmi hna hi, Pathian hmai zongah ka lih lo)

²¹ Cu hnu ah Siria le Silisia ramah ka kal ṭhân.

²² Cun Krih ah a ummi Judia ram kawhhran hna hngalhmi hmanh ka si rih lo.

²³ An theihmi cu, “Hlan i a kan serhsat i zumhnâk hrawh a tim tupa nih khan zumhnâk kong a chim cang,” ti lawng kha a si.

²⁴ Keimah ruangah Pathian kha an thangṭhat.