FILIPI 4 - Laibaibal Thiang (BSI)

¹ Cucaah ka dawtmi le ka ngaihtuk hrinhranmi unau, kâ lawmhnâk le ka bawi luchin hna, dawtmi hna, cubantukin Bawipa ah fek tein dir u.

² Bawipa ah ruahnâk pakhat ngeiin Evodia le Sintikhe kan nawl hna.

³ Cun nang ka ṭuanpi hawi taktak kan nawl ko, kha nu hna, thawngṭha i ka ṭuanpi mi hna kha bawm hna. Klemen he, ka ṭuanpi hawi, Nunnâk cauk i min an ṭialmi hna he khan.

⁴ Bawipa ah i lawm zungzal u, ka nolh ṭhân lai, i lawm u!

⁵ Lungnemmi nan sinâk kha mi vialte hmuhah siseh, Bawipa cu a nai ko.

⁶ Zeithilhmanhah lungrethei in um hlah u, zeizong vialte ah thlacam le hal in, lawmhnâk bia chimchih pengin, nan duhnâk hna cu Pathian sinah hngalhter u,

⁷ cun Pathian daihnâk, theihthiamnâk vialte a lonhtu nih khan nan lungthin le nan ruahnâk kha Krih Jesuh ah a kilven lai.

⁸ A donghnâk ah unau hna, a dikmi, hmaizah awk a tlâkmi, a thiangmi, duh a nungmi, a thangṭhami, ṭhatnâk a um i thangṭhat awktlâk a si ahcun, cucu ruat hna u.

⁹ Nan cawnmi, nan pommi, nan theihmi le keimah i nan hmuhmi zong kha, khabantuk kha tuah u, cuticun daihnâk Pathian nih an umpi hna lai.

¹⁰ Ka zawn nan ruahnâk nai te ah nan tharchuah ṭhân caah kâ lawm taktak. Cubantuk cu nan timh peng ko nain cân rem nan hmuh lo bia a si.

¹¹ Ka chamhbaunâk kong lawng ka chim lo, kei cu zeitipauh in um hmanh ninglaw lungtlin ka thiam cang.

¹² Niamte i um ka thiam i rum zong ka thiam. Khuazei pauh ah, zeizong vialte ah pawkhim le rawlṭâm i um le rum le chamhbau i umning biathli cu ka hngalh cang.

¹³ A ka ṭhawntertu Krih ah zeizong vialte ka tuah khawh.

¹⁴ Zei a si zongah, ka vansânnâk nan i hrawm ve caah nan ti ṭha ngaingai.

¹⁵ Nannih Filipi mi hna, thawngṭha a phanh ka i Masidonia ram in ka chuah ah khan nanmah dah ti lo cu, kawhhran dang pakhat hmanh nih thilpêk le hmuh kongah anka bawm lo ti kha nan hngalh.

¹⁶ Zeitintiah Thesalonika khua i ka um lio ah, ka chamhbaunâk tlinter awkah voikhat lawng hmanh si loin voihnih tiang nan rak kuat.

¹⁷ Thilpêk ka kawl lo, nanmah ah theitlai kha karh hna seh ti kha ka kawlmi a si.

¹⁸ A ngaingai tiah zeizong vialte tam ngaiin ka ngei, zeihmanh ka bau lo, Epafarodistas kutah nan rak kuatmi thil kha ka hmuh hna, cucu a rim a hmuimi, cohlan awktlak raithawinâk le Pathian lomhtertu ṭha an si.

¹⁹ Ka Pathian nih Krih Jesuh i a sunglawi ngaimi a rumnâk chungin nan herhmi vialte an pêk hna lai.

²⁰ Cubangin kan Pathian le kan Pa sinah sunparnâk cu zungzal in zungzal tiang um ko seh. Amen.

²¹ Krih Jesuh ah mithiang vialte kha an kut ka tlaih piak hna u. Ka sinah a ummi unau hna nih nan kut an in tlaih hna.

²² Mithiang vialte nih nan kut an in tlaih, a hlei in Sizar chungkhar hna nih an in tlaih hna.

²³ Kan Bawipa Jesuh Krih zângfahnâk cu nan dihlak cungah um ko seh. Amen.