FILIPI 3 - Laibaibal Thiang (BSI)

¹ A donghnâk ah ka ule nau hna, Bawipa ah i lawm u. Zeitintiah ṭial cangmi bia ṭial ṭhân hi ka neng lo i nan caah kilvengtu a si.

² Uico hna lakah i ral ring u, Ṭhatlonâk a tuahtu hna lakah i ralring u law, cuarpartan a uartu hna lak zongah i ral ring u.

³ Zeitintiah kannih Thlarau in Pathian a bia i thisa i bochan loin Krih Jesuh ah â lawmmi hna hi cuarpar tanmi kan si deuh,

⁴ a ngaingai tiah keizong thisa kongah bochan awk ka ngei ve. Thisa cungah bochan ding ka ngei a timi an um ahcun, ka ngei chin chin,

⁵ niriat niah cuarpartan, Israel hrinthlâk, Benjamin tefa, Hebru le Hebru hrinmi ka si, nawlbia ah Farasih ka si.

⁶ zuamnâk lei ah kawhhran serhsattu ka si, nawlbia i dinnâk ah dotla ka si.

⁷ Asinain ka ca i miaknâk a simi hna cu Krih ruangah sunghnâk ah ka ruah dih.

⁸ Asi taktak ko, a liannganmi ka Bawipa Jesuh Krih hngalhnâk ruangah thil vialte hi sungh cikcek ah ka ruah dih, asi zeizong vialte hi ka sung cikcek ko. Krih kha ka miakmi a si khawh ahcun thildang vialte cu hmunthûr ah ka rel hna.

⁹ Amah i ummi ka si khawh nâkhnga, nawlbia zulh ruang i dinnâk si loin, Krih zumhnâk thawngin dinnâk, zumhnâk thawngin Pathian sinin dinnâk cu ka ngeihmi a si.

¹⁰ A thihnâk ah thiin, a tuarnâk kâ hrawm ve ahcun, a thawhṭhannâk ṭhawnnâk zong ka co ve ko lai.

¹¹ Cuticun zeilei pauh in thih nâkin thawhṭhannâk cu ka co khawh ve lai.

¹² Tlâm ka tling cang ka ti lo i co awk ka co dihcang zong ka ti lo. Asinain Krih nih aka tlaihchan hi ka tlai kho ve hnga maw tiin a dawiin ka dawi.

¹³ Unau hna ka tlaih dih cang tiah ka ruat lo, asinain thil pakhat ka tuah tawn - hnulei i a ummi thil hna kha philh in, hmailei i a ummi thil kha banh in,

¹⁴ Krih Jesuh ah Pathian nih cung leiin a ka kawh chan ṭuanman hmu dingin kawltung lei cu ka panh.

¹⁵ Cucaah kannih puitling deuh nih cubantuk lungput cu ngei u sih, cun zei lei pauhah ruahnâk dang nan ngeih ahcun Pathian nih an hngalhter hna ko lai.

¹⁶ Zeiasihmanhah kan phanhnâk riin, kan kal ning tein, ruahnâk pakhat ngeiin hmai nawr u sih.

¹⁷ Unau hna ka umtuning hi rak i zohchunh u. Zohchunhding nankan ngei, kan nun ningin a nungmi hna kha i zohchunh hna u.

¹⁸ Zeitintiah mi tampi an kal i Krih vailam ralchanhtu an si tiah kan chimh cang hna kha, atu zongah ṭah buin kan chimh ṭhân hna.

¹⁹ cuhna donghnâk cu rawhralnâk a si, an pathian cu an paw a si, vawlei thil lawng lawng an ruah caah an sunparnâk zong mualphonâk a si.

²⁰ Zeitintiah kannih cu vancung rammi kan si, van in a ra dingmi, khamhtu Jesuh Krih cu hngahhlang ngaiin kan cuan ko.

²¹ Zeizong vialte Amah nawl i a umter khotu rianṭuannâk bangin a niam ngaimi kan pum hi a sunglawimi Amah pum bantukah a thlen te lai.