FILIPI 2 - Laibaibal Thiang (BSI)

¹ Cucaah Krih ah thapeknâk a um i dawtnâk hnangamnâk a um i Thlarau hawikomhnâk, vêl le zângfahnâk kha a um ahcun,

² ruahnâk pakhat le lungrual te i um in, â khatmi dawtnâk ngeiin, duhnâk pakhat i hrawm in, kâ lawmhnâk tlinter u.

³ Mahzawn lawng ruahnâk le, puarthaunâk in zeihmanh tuah hlah u, toidornâk lungput he mah nâkin midang ṭhadeuh ah ruat cio hna seh.

⁴ Mah lungtluknâk lawng zoh loin midang lungtluknâk zong zoh seh.

⁵ Hi lungput Krih Jesuh zong i a ummi kha nanmah zongah um ve seh.

⁶ Amah cu Pathian sinâk ngeitu asinain, Pathian tluk i um kha hranhrâm in cuh awkah a ruat lo,

⁷ Amah le Amah i lawn terin, ṭemmi-sal dirhmun kha â lak i minung bantukah â cang.

⁸ Minung bangin hmuh a si i Amah le Amah i niam terin vailam cung i thih tiangin nawl a ngai.

⁹ Cucaah Pathian zong nih sâng ngaiin a cawi i min vialte lakah min cungnung bik kha a pêk.

¹⁰ Cuticun Jesuh minin mi kip, vancungmi le, vawleimi le, vawlei tangmi vialte an khuk an bil lai i

¹¹ lei vialte nih Pa Pathian sunparnâk dingah Jesuh Krih cu Bawi a si, tiin an phuan lai.

¹² Cucaah ka dawt le hna, nawl nan ngaih tawn bangkhan, ka um lio lawngah si loin, atu ka um lo zongah ngai chin chinin ṭih le ther buin khamh nansinâk kha chuak lakin ṭuan ve u,

¹³ zeitintiah Amah lawmhnâk le duhnâk bangin nanmah ah a ṭuntu cu Pathian a si.

¹⁴ Phunzai lo le elhnial loin zei thil pauh hi tuah u,

¹⁵ â merhmi le â ngerhngawimi chan ah hin, Pathian fa, palhnâk ngei lo, fahnâk pe lo le, sawi awk um loin vawlei ah ceunâk bangin nan ceu lai,

¹⁶ Krih ni ah kâ lawmhnâk hnga le, pakpalawng i a ṭuanmi le a tlimi ka si nâkhnga lo nunnâk bia cu fek tein i tlaih u.

¹⁷ Asi, zumhnâk i rian nan ṭuannâk le raithawinâk nan tuahmi i nan din awkah bungh dih ka si hmanh ah nan dih lak sinah kâ nuam in kâ lawm ko lai.

¹⁸ Zeitintiah hi â khatmi ruahnâk ah hin nannih zong i lawm ulaw ka lawmhpi ve u.

¹⁹ Nan kong ka theih i lungdai tein ka um khawh nâkhnga Timote hi nan sinah kuat zau dingin Bawipa Jesuh ah zumhnâk ka ngei.

²⁰ Zeitintiah amah hleiin biatak tein nan zawn a ruattu midang ka ngei lo.

²¹ Zeitintiah midang vialte cu Krih caah kawl loin anmah caah a kawlmi an si.

²² Asinain a nih cu a sining nan hngalh cang, fa nih a pa caah a ṭuan bantukin thawngṭha rian a ka ṭuanpi tawn.

²³ Cucaah ka ṭhutdirning a fian le cângkâ amah hi rak thlah cawlh ka timh.

²⁴ Cun keimah hrimhrim zong ka rat zau khawh nâkhnga Bawipa ah kâ hngat dih ko.

²⁵ Epafaroditas ka unau pa, ka ṭuanpi hawi le ralkap hawi, ka chamhbaunâk bawmtu dingah nan rak thlahmi hi nan sinah ratter ṭhân a herh tiah ka ruah.

²⁶ Nan dihlak in biatak tein an ngai tuk hna, cun a zawtnâk kong nan theih ruangah poi a ti ngai ngai.

²⁷ Zeitintiah thi hnikin a zaw taktak; asinain Pathian nih a zângfah, amah lawng si loin keimah zong a ka zângfah, culoahcun, ngaihchiatnâk cungah ngaihchiat chin chinnâk ka ngei ko hnga.

²⁸ Cucaah amah nan hmuh i nan lung a daih nâkhnga le, keimah zong ka thil a zân deuh nâkhnga a ran nâkin ratter ka timh.

²⁹ Cucaah Bawipa ah lunglawm tein rak cohlâng u, hibantuk mi hna hi biapi ngaiin rak ruat u.

³⁰ Zeicatiah nanka bomhnâk nih a tlinh lomi tlinter awkah, a nunnâk tiang ruat loin Krih rian a ṭuannâk ah a thi deng mang.