FILIPI 1 - Laibaibal Thiang (BSI)

¹ Paul le Timote, Krih Jesuh ah ṭemmi-sal hna nih, Filipi khua ah a ummi Krih Jesuh ah mithiang vialte le hotu le upa hna sinah;

² Pathian kan Pa le Bawipa Jesuh Krih sinin zângfahnâk le daihnâk nan sinah um ko seh.

³ Nan kong karuah fate ka Pathian sinah lawmhnâk bia ka chim tawn,

⁴ zeitintiah ni hmasa bikin atu tiang thawngṭha phuannâk ah hawikawmhnâk nankan ngeih peng caah,

⁵ nan caah thlacamnâk le nawlnâk kha lunglawm tein ka tuah zungzal.

⁶ Nanmah i rianṭha a thawktu nih Jesuh Krih ni tiangin a tlinter ko lai ti kha ka zumh.

⁷ Ka lungthin ah nan ummi hi ka ruah tikah ka caah a dikmi a si tiah ka ruah, cikcin i khih ka sinâk le, thawngṭha kilvennâk le diknâk fehter dingin ka ṭuanmi rian ah nannih zong nih zângfahnâk in nan i hrawm ve.

⁸ Zeitintiah Jesuh Krih velngeihnâk thawngin nan dihlak i hmuh kan duhning hna a ka hngalhpitu cu Pathian a si.

⁹ Nan dawtnâk cu a tam chin lengmang i hngalhnâk le chunglei hmuhkhawhnâk nan ngeih chin chin nâkhnga thla ka cam.

¹⁰ Cuticun Krih ni a phâk tiangin zumhtlâk le dotla nan si khawh nâkhnga, thilṭha sunlawinâk kha nan hngalh khawh lai i

¹¹ Pathian suparnâk le thangṭhatnâk caah, Jesuh Krih i a ummi dinnâk theitlai in nan khat lai.

¹² Ule nau hna, ka cung i a tlungmi thil kha thawngṭha karhnâk ding a si lehlam ti kha nan hngalh ka duh,

¹³ cuticun cikcin i khih kasinâk chan hi siangpahrang inn a kilvengtu ralkap vialte sinah le mi vialte sinah Krih ruangah a si ti kha fiang tein a lang cang.

¹⁴ Bawipa ah unau tamdeuh zong nih cikcin i khih ka si chan hi an hngalh cang, cuticun bia chimnâk ah ṭihnâk um loin an ral tu a ṭha chin chin.

¹⁵ Cheukhat nih hnahchuahnâk le elhnialnâk he Krih bia hi an chim tawn, cun cheukhat nih duhnâk ṭha he an chim.

¹⁶ Ahmasa deuh hna nih lungtak tak si loin, mah zawn ruahnâk le cikcin khih ka sinâk chapchih duhah Krih kong an chim tawn,

¹⁷ asinain hmadung deuh hna nih cun thawngṭha kilvengtu i ruahmi ka si kha hngalin dawtnâk in an chim tawn.

¹⁸ Zeidah poi? A deu in siseh, a tak in siseh, zeitilei pauh zongin Krih kong chim a si ko, cunih cun a ka lawmhter, kâ lawm chin lai.

¹⁹ Zeitintiah nan thlacam piaknâk le Jesuh Krih Thlarau bomhnâk thawngin cu thil cu ka caah khamhnâk ah â cang lai ti kha ka hngalh.

²⁰ Hi ka taksa ah hin thihnâk in siseh nunnâk in siseh Krih cu thangṭhat in a um hrimhrim ko lai, zei thil pauh ah mualpho in ka um lai lo ti kha ralṭha in kâ ruahchanmi a si.

²¹ Zeitintiah ka caah, nun hi Krih a si i thih hi miak a si.

²² Asinain ka nun ah cun theitlai chuah lakin rian ka ṭuan lai tinâk a si i a zei deuh dah kâ thim lai, ka hngal lo.

²³ Zeitintiah kaphnih in hnuh chih ka si. Chuah i Krih sin um ka duh, cucu a ṭha deuh ngai ngai.

²⁴ Asinain taksa i umpeng hi nan caah a herh deuhmi a si.

²⁵ Cubantuk zumhfehnâk cu ngeiin, zumhnâk i lawmhnâk ah nan ṭhânchoh nâkhnga nan dihlak sinah ka umpeng ko rih lai ti kha ka hngalh,

²⁶ nansin ka rat ṭhân lai caah ka ca i nan i lawmhnâk cu Jesuh Krih ah a tam chinchin lai.

²⁷ Zeiasihmanhah, nan nunning le Krih thawngṭha cu i rem ko seh, cuticun nan sin i ka rat i kan hmuh hna ah siseh, nan sin i ka um lo ah siseh, thlarau pakhat i nan umnâk kong le ruahnâk pakhat i thawngṭha bia ah ṭhahnem nan ngaihning kha kan theih khawh lai,

²⁸ cun nanmah dohtu hna ruang i ṭih lo tein nan umnâk kong kha kan theih khawh lai, cucu an nih caah an kalsualning langhtertu a si i nannih caah Pathian sinin khamhnâk tu a si lai.

²⁹ Zeitintiah Krih aiawh i rian pêk nan si ah hin, Amah nan zumh lawng si loin Amah ruang i temtuar zong pêkchih nan si,

³⁰ keimah i nan hmuhmi raldohnâk atu tiangah a ummi bantuk hi nan ngeih ve cang.