FILEMON 1 - Laibaibal Thiang (BSI)

¹ Paul Krih Jesuh ah thong a tlami le kan unauTimote nih kan dawtmi le kan ṭuanpi hawi Filemon sin ah le,

² kan dawtmi Afia le kan ralkap ṭuanpi Arkhippas le na in i kawhran hna sinah,

³ Pathian kan Pa le Bawipa Jesuh Krih sinin zângfahnâk le daihnâk nan sinah um ko seh.

⁴ Ka thlacamnâk ah na min chim in Pathian sinah lawmhnâk bia ka chim tawn.

⁵ Bawipa Jesuh le mithiang vialte sinah na ngeihmi dawtnâk le zumhnâk kha thei in,

⁶ na zumhnâk cu midang sinah na hngalhternâk thawngin Krih Jesuh ah na chung i a ummi ṭhatnâk phunkip hna nih hmual an ngeih khawh lai.

⁷ Zeitintiah unau, nanmah thawngin mithiang hna lungthin tharchuah in a um cang, na dawtnâk nih a liannganmi lawmhnâk le hnangamnâk a ka pêk.

⁸ Cucaah â tlâkmi nawl pe dingin Krih ah ralṭha ngaiin um hmanh ning law,

⁹ dawtnâk ruangah kei Paul tarkhat zong a tarmi le Jesuh Krih caah thong a tlami nih a nawl in kan nawl.

¹⁰ Cikcin he ka um lio ah ka hrinmi kafa Onesimas caah hin kan nawl,

¹¹ amah hi hlan ah na caah sân a tlai lo nain atu ah cun na ca le ka caah san a tlai cang.

¹² Amah cu ka rak thlah ṭhân. Cucaah amah cu rak cohlang ko, ti hi lungthin taktak in kan nawl,

¹³ amah hi thawngṭha caah cikcin khih ka sinâk ah nangmah ai awh in rian a ka ṭuanpiak nâkhnga ka sinah umter peng ka duh.

¹⁴ Asinain na hnatlâknâk loin zeihmanh tuah ka duh lo, cucu thilṭha na tuahmi zong hnekchawm si loin mah lungtho tein tuahmi a si nâkhnga.

¹⁵ Zeitintiah cân tawite an ṭhenmi hi zungzal i na ngeih thainâk cânrem zong a si kho ko,

¹⁶ sal bantuk si ti loin salnâk i a ṭha deuhmi-dawtmi unau bangin a si hnga lo maw, a hleiin kaca zongah duhnung a si ahcun naca zongah taksa le Bawipa ah duhnung a si chin chin ko lai.

¹⁷ Cuticun rianṭuanpi hawi i naka ruah ahcun keimah naka cohlân bantukin amah hi rak cohlang te.

¹⁸ Na cungah palhnâk a rak ngeih i na lei anbat ahcun keimah bat ah ruat.

¹⁹ Kei Paul nih ka kut hrimhrim in ka ṭialmi a si. Keimah nih ka champiak lai, ka sinah nangmah nih leiba na ngei ka tinâk cu a si lo.

²⁰ Asi unau, Bawipa ah na sinin lawmhnâk ka ngeihter law; Bawipa ah ka lungthin hi hlauhter hram ko.

²¹ Ka chimmi na zulh ko lai tiah ralṭhatnâk ka ngeih caah hi câ hi ka rak ṭial, ka chimmi nâk hmanh i ṭhadeuh in na tuah lai ti kha ka hngalh.

²² Biakarlakah tlunnâk ding rakka timhlamh piak, nan thlacamnâk thawngin nan sinah pêk ka si zau lai tiah ka zumh.

²³ Epafaras Krih Jesuh ah ka thongtlakpi nih nakut an tlaih,

²⁴ ka ṭuanpi hawi Marka, Aristarkhas, Demas le Luka zong nih cubantukin na kut an tlaih.

²⁵ Kan Bawipa Jesuh Krih zângfahnâk na thlarau sinah um ko seh. Amen.