EFESA 6 - Laibaibal Thiang (BSI)

¹ Ngakchia hna, Bawipa ah nan nu le nan pa nawl ngai hna u, cucu a dikmi a si.

² “Nanu le napa upat hna” timi hi biakamnâk he nawlpêk hmasabik a si.

³ “Cuticun na caah a ṭha lai i vawlei ah na nun khua a sau lai,”

⁴ Cun pale hna, nan fale an thin hunter hna hlah u, Bawipa chimhhrinnâk le, nunchimhnâk tu in zohkhenh hna u.

⁵ Sinum hna, Krih bia nan ngaih bantukin, ṭih le phâng bu tein lungthin tak takin,

⁶ mit rianṭuantu bantuk si loin, minung lawmhtertu men zong si loin Krih sinum taktak bantukin, Lungthin tak takin Pathian duhning tuah in,

⁷ minung rianṭuantu bangin ṭuan loin nanmah te nan i pêknâk bangin rian ṭuan u,

⁸ sinum siseh, miluat siseh, mikip nih thilṭha an tuahning cio in Bawipa sinin a sining tein an hmuh ṭhân te lai ti kha hngal bu tein nan hotu le hna nawl ngai u.

⁹ Nannih hotu le hna, nan Hotu taktak cu vanah a um ti le, Amah ah thleidannâk a um lo ti kha hngal in, hrocer loin an cungah tuah ve u.

¹⁰ A donghnâk ah ka ule nau hna, Bawipa le a lianngan mi a ṭhawnnâk ah ṭhawng ngaiin um u.

¹¹ Khuachia hlenthawinâk chungin nan dir khawh nâkhnga Pathian raltluam tlingin i thuam u.

¹² Zeitintiah thisa le thisen he kan i pai lo, asinain kan dohmi hna cu bawinâk le, nawlngeihnâk le, hi vawlei khuamui i biaceihtu hna le van hmun i thlarau sual hna khi an si.

¹³ Cucaah ni ṭhalo ah nan dir khawh nâkhnga le, nan tei dih hnu zongah nandir khawh peng nâkhnga, Pathian ralthuam tlingin i thuam u.

¹⁴ Cucaah fek tein dir u law, nan taiah biatak in i sawm u, dinnâk ṭangphaw i benh u,

¹⁵ cun daihnâk thawngṭha caah timhcia i umnâk kha nan kedan ah hmang u law,

¹⁶ hi thil vialte hleiah a alhkhomi misuaksual pa thal vialte hmihnâk caah zumhnâk phaw i lak u.

¹⁷ Cun khamhnâk kha luchin ah hmang u, Thlarau vainam Pathian Bia kha i tlaih in;

¹⁸ thlacamnâk le nawlnâk vialte kha Thlarau in tuah ulaw, fimhring te le ralring tein mithiang vialte caah biatak tein thla cam u-

¹⁹ cun thawngṭha biathli cu phuang dingin pêk ka si i ka kâ ka ân i ral ṭhain ka chim khawh nâkhnga thla ka campiak ve u,

²⁰ zeitintiah hi thawngṭha Lamkaltu, cikcin in hrenchihmi ka si, cucaah ka chim hngami ral ṭhain ka chim khawh nâkhnga ka nawlpiak u.

²¹ Nannih zong nih ka kong le ka um tuning nan hngalh khawh nâkhnga Ṭaikhikhas, Bawipa i dawtmi unau le zumhawktlak rian ṭuntu nih hin zeizong vialte an chimh hna lai,

²² hi thil ruangah amah hi nan sin i ka rak thlahnâk cu a si, kan rianṭuannâk kong nan hngalh i amah zongnih nan lungthin hnâ a ngamter nâkhnga.

²³ Pa, Pathian le Bawipa Jesuh Krih sinin daihnâk le zumhnâk â telmi dawtnâk cu unau hna sinah khan um ko seh.

²⁴ Kan Bawipa Jesuh Krih zumhtlâk i a dawtu vialte sinah zângfahnâk um ko seh. Amen.