EFESA 5 - Laibaibal Thiang (BSI)

¹ Cucaah a fa dawtmi bangin Pathian â zohchunhtu si ko u.

² Krih nih a kan dawt i Pathian sinah raithawinâk le rimhmui pekchanhmi ah kan ca i â pêk bangin dawt nâkin nung u.

³ Mithiang hna tuah awk ah â tlak bangin nupa sualnâk, thurhnawnhnâk le haukauhnâk hna cu nan lakah a chim hmanh chim hlah u,

⁴ zer kong caih le, holh dawhcah lo le, a thûrhnawmmi capo saih zong hi nan caah â dawh lo, cu nâk cha cun, lawmhnâk biatu chim deuh u.

⁵ Zeitintiah nupa sualnâk tuahtu, mithûrhnawm, hakkaumi, hakkauh cu milem biak a si: cubantuk mi hna nih Krih le Pathian Pennâk ah co awk ro zeihmanh an ngei lo ti kha nan hngalh.

⁶ Ahohmanh nih pakpalawng biain in hleng hna hlah seh: cuthil hna ruangah dah kaw zumlotu cungah Pathian thinhunnâk cu a langh tawn.

⁷ Cucaah cubantuk mi cu kawm hna hlah u.

⁸ Zeitintiah hlanah khuamui nan rak si nain atu cu Bawipa ah khuaceu nan si. Cucaah khuaceu fale bantukin nung u,

⁹ (zeitintiah Thlarau theitlai cu ṭhatnâk, felnâk le biatak vialte ah a lang),

¹⁰ Bawipa cohlan awk a tlâkmi kha zeidah a si ti hngalh rak i zuam u.

¹¹ Cun khuamui rianṭuan theitlai a ngei lomi sinah i tel hlah u, a dik lo ning tu langhter u.

¹² Zeitintiah a thliin an tuahmi thil hna cu chim awk hmanhah ningzah awktlâk an si.

¹³ Asinain thil vialte a sining tein langhtermi hi ceunâk rianṭuan a si, zeitintiah langhtermi pauh cu ceunâk a si.

¹⁴ Cucaah hitihin a chim, “Nang, â hngilhmi i hlau law, thihnâk in tho law Krih nih an ceuh lai,”

¹⁵ Cu thil hna cu zoh in mihrut bang i um loin mifim bangin ralring tein um u.

¹⁶ Cân chia i kan um caah, cân ṭha nan hmuhmi ṭha tein hmang u.

¹⁷ Cucaah mihrut bangin um hlah u, Bawipa duhnâk zeidah a si ti kha hngalh u.

¹⁸ Cun misur hang ri hlah u, cucu lohtlau tertu a si, Thlarau tu in khat deuh u.

¹⁹ Biazâi le hla in, thlarau lei hla hna he pakhat le pakhat i chawnbia u law, hlasak pah in Bawipa cu nan lungthin ah ring-awn tum piak u.

²⁰ Kan Bawipa Jesuh Krih min in Pa Pathian sinah zeizong vialte ah lawmhnâk bia chim u.

²¹ Pathian ṭihzahbu tein pakhat le pakhat i hmaizah u.

²² Nupi le hna Bawipa nan ṭihzah bantukin, nan va le ṭihzah hna u.

²³ Zeitintiah Krih cu pum khamhtu siin, kawhhran lu a si bantukin, pasal zong nupi lu a si.

²⁴ Cucaah kawhhran hna nih Krih an ṭihzah bantukin nupi le zong nih zeizong vialte ah an va le ṭihzah ve hna seh.

²⁵ Va le hna nan nupi le daw hna u. Krih nih kawhhran a dawt i an ca-ah â pêk bantuk khan,

²⁶ anih cu bia hmangin ti in a khawlh-ṭawl i a thianter khawh lai;

²⁷ cuticun a liannganmi kawhhran, thûrhnawm lo le sawngkawr lo, a thiangmi le sawiawk um loin Amah sin lila ah a pêkchanh khawh lai.

²⁸ Cubantukin va le zong nih anmah pum bantukin an nupi le cu an dawt awk a si. Mah nupi a dawttu nih amah â dawt a si.

²⁹ Zeitintiah ahohmanh nih mah pum an hua bal lo, an dawt i an cawm tawn. Bawipa nih a kawhhran a dawt i a cawm bantukin.

³⁰ Zeitintiah kannih cu Amah pumnge a taksa le a ruh kan si.

³¹ “Hiruangah hin pa nih anu le apa a kaltâk in a nupi he an i pehtlai lai i an pahnih in taksa pumkhat an si cang lai.”

³² Hihi a thûk ngaimi biathli pakhat a si, asinain Krih le a kawhhran kong ka chim.

³³ Zeiasihmanhah, mi zei pauh nih amah â dawt bangin a nupi daw sehlaw, nupi zong nih a va upat seh.