EFESA 4 - Laibaibal Thiang (BSI)

¹ Cucaah, kawh nan sinâk he â tlakmi nunning i nun awkah, kei, Bawipa i thong a tlami nih kan nawl hna;

² toidornâk le nunnemnâk, lungsaunâk le dawtnâk i inkhawhnâk vialte he

³ daihnâk ah i funtom in, Thlarau i pumkhat sinâk kha i tlaihpeng u sih.

⁴ Ruahchannâk pakhat i kawh nan si bangin, pum pakhat le Thlarau pakhat lawnglawng a um,

⁵ Bawipa pakhat, zumhnâk pakhat, baptisma pakhat,

⁶ Pathian pakhat le zeizong vialte Pa, zeizong vialte cungah, zeizong vialte lan in, zeizong vialte chung le nan dihlak chungah a ummi a si.

⁷ Asinain Krih thilpêk tahnâk bangin mikip sinah zângfahnâk cu pêk a si.

⁸ Cucaah hitihin a chim, “Cunglei i a kai lio ah khan, tlaihmi sal kha â kaipi hna i, minung sinah thilpêk a pêk hna.

⁹ (Cubangin, “A kai timi hi zeidah a sullam? Vawlei tang bikah a rung ṭum khawh nâkhnga.

¹⁰ A rungṭummi cu van vialte cung i a kaimi kha a si, cucu thil vialte ah a khah dih khawh nâkhnga caah a si.)

¹¹ Amah nih cheukhat lamkaltu ah, cheukhat profet ah, cheukhat evangelist ah, cheukhat pastor le cheukhat cawnpiaktu ah a pêk hna.

¹² zeitintiah mithiang hna timhtuahnâk i rianṭuantu ding le Krih pum ṭhanter dingah,

¹³ Pathian Fapa theihhngalhnâk kong le zumhnâk ah kan dih lakin pumkhat kan si nâkhnga, Krih tlamtlinnâk bantukin nutling patling ah kan i chuah lai i

¹⁴ fimzer ngai le thiam ngaiin mi a hlengtu cawnpiaknâk thlitu phunkip nih a thenh lengmang mi ngakchia si ti loin,

¹⁵ dawtnâk in biatak tu kan chim lai i Lu a simi Amah ah a lamkip in kan ṭhang kho lai-

¹⁶ Amah in pum dihlak kha, rem tein hmunkhat ah pehtonh dih in, nge vialte rianṭuan ning cio cu fonh in, dawtnâk i i sersiam awkah, pum cu a ṭhanter tawn.

¹⁷ Cucaah hihi Bawipa ah kan hngalhter hna, santlai lomi ruahnâk ngeitu, Gentel mi bangin um ti hlah u.

¹⁸ Annih cu Pathian nunnâk chungin ṭhen an si i an ruahnâk cu a mui dih, an lung a khon ruangah i hngalhchuahnâk an ngei kho ti lo,

¹⁹ cu hna cu poi tinâk ngei lo le ningzah hngal loin, thûrhnawmhnâk ah zat ti um loin, hornâk ah an i pumpe.

²⁰ Asinain Krih ah nan cawnmi cu cubantuk a si lo.

²¹ Amah cu nan theih i Amah cawnpiakmi nan si taktak ahcun, Jesuh i a ummi biatak bang khan,

²² hlan lio nan nunning i minung hlun ziaza, hlen a duhmi kha i phoih u law,

²³ nan ruahnâk thlarau ah tharchuah in um ko u,

²⁴ minung thar, dinnâk le thiannâk taktak Pathian duhning i sermi in i thuam u.

²⁵ Cucaah, lihchim ngol in, mikip nih mahle inpa sinah biadik chimseh, zeitintiah pakhat le pakhat fonhmi membar kan si.

²⁶ “Thinhung ko, sualnâk tu tuah hlah,” na thinhunnâk nitlâk pi hlah,

²⁷ khuachia caah hmun pe hlah.

²⁸ Firhmang nih fir ti hlah seh, chambau mi a bomh khawh nâkhnga a kut in ba lakin rian ṭuan seh.

²⁹ Bia ṭhalo nan kâ in chuak hlah seh, mi ṭhatnâk ding bia tu chim deuh ulaw, nan bia ngaitu caah zângfahnâk si ko seh.

³⁰ Pathian Thiang Thlarau kha ngaihchiatter hlah u, tlanhnâk ni caah Amah ah chinchiahmi nan si cang.

³¹ Chiatkhâtnâk le, thinhunnâk le, thinhânnâk le, i siknâk le, thangchiatnâk vialte hlei ah, ruahnâk chia-kha vialte hi nan sinin hloh dih si hna seh.

³² Pathian nih Krih ah an ngaihthiam hna bangin i zângfah in, vel i ngeih ulaw, i ngaithiam u.