EFESA 3 - Laibaibal Thiang (BSI)

¹ Hiruangah hin keimah Paul, nanmah Gentel mi hna caah Krih Jesuh ah thong i a tlami hi-

² nan ca i Pathian zângfahnâk rian aka pêkmi hi nan hngalh tak tak ahcun,

³ zeitindah cu biathli cu langhnâk i hngalhter ka si kha (hlan ah tawi tein ka ṭial cangmi kha,

⁴ kha kha nan rel tikah Krih biathli ka hngalhning hi nan theihthiam ko lai),

⁵ Thiang Thlarau nih atu lio i a thiangmi a lamkaltu hna le profet hna sinah a langhter bantukin, cuhlan ah minung fale hna sinah hngalhter a rak si lo:

⁶ Cu biathli cu Thawngṭha thawngin Krih ah Gentel mi hna hi rocopi hawi, pum ṭengnge, biakam co pitu an si, timi hi a si.

⁷ A ṭhawnnâk rian, hmual a ngei ngaimi in ka sinah pêk a simi Pathian zângfahnâk thilpêk ningin cu thawngṭha rianṭuantu ah cantermi ka si.

⁸ mithiang vialte hna lakah a hme bik nâkin a hme deuhmi ka si nain, a dongh kho lomi Krih rumnâk hi Gentel mi hna sinah ka chim nâkhnga,

⁹ Jesuh Krih thawngin zeizong vialte sertu Pathian nih zungzal in a rak thuhmi i hawikawmhnâk biathli cu mi vialte sinah phuang dingin hi zângfahnâk hi pêk ka si.

¹⁰ Cuticun van hmun i bawinâk le nawlngeihnâk tiangah khin a liannganmi Pathian fimnâk hi kawhhran hna nih an hngalhter khawh lai,

¹¹ cucu zungzal a rak tinhning tein kan Bawipa Jesuh Krih ah a tlinter.

¹² Amah i zumhnâk thawngin amah lila ah khan ralṭha le ngamh ngaiin luh khawhnâk kan ngei.

¹³ Cucaah nanmah ruang i kan inmi harnâk ruangah nan lung dong hlah seh, cucu nan sunparnâk a si.

¹⁴ Hi ruangah hin kan Bawipa Jesuh Krih i a Pa hmaiah khuk bilin ka kun tawn,

¹⁵ Amah cu lei le van i chungkhar vialte nih min an i bunhnâk a si.

¹⁶ A rummi a sunparnâk bangin nan chunglei minung kha Amah Thlarau nih ṭhawnnâk an pêk hna lai,

¹⁷ cun zumhnâk thawngin Krih cu nan lungthin ah khua a sak khawhnâk hnga le dawtnâk ah hram nan bunh i hngatchan miah nan i ngeih khawh nâkhnga,

¹⁸ mithiang vialte hna he, a kauhning, a sauning, a thuhning le a sanning hna hngal kho ding le,

¹⁹ hngalh cawk lomi Krih dawtnâk hngal kho dingin Pathian tlamtlinnâk i tlinter in nan um kho lai.

²⁰ Cuticun kanmah i rian a ṭuan tawnmi ṭhawnnâk bangin kan halmi le kan ruahmi vialte nâk i tam deuh i rian a ṭuan khotu sinah,

²¹ zungzal in chan vialte tiangin kawhhran le Krih ah sunparnâk um ko seh. Amen.