EFESA 2 - Laibaibal Thiang (BSI)

¹ Cun nannih nawlbuarnâk le sualnâk ruangah a thimi nan si lioah Amah nih an nunter hna;

² hlanah hi vawlei phung ningin khua nan rak sa, vanrâng i ṭhawnnâk bawi, atu i nawlngai lomi hna chungah rian a ṭuntu thlarau duh ningin,

³ kannih zong hlanah cun kan thisa duhnâk zulin anmah bantukin kan rak um ve, thisa ruahnâk le duhnâk zulh in kan rak nung i midang bantukin kan kokek in thinhunnâk fa kan rak si.

⁴ Asinain Pathian, zângfahnâk in a rummi le a liannganmi dawtnâkin a kan dawt caah,

⁵ nawlbuar ruang i a thimi kan si lio ah, Krih sinah a kan nunter (zângfahnâk in khamh nan si),

⁶ cun hmunkhat ah an kan thawhter i van hmunah Krih Jesuh he hmunkhat ah a kan ṭhutter,

⁷ ara laimi chan ah Krih Jesuh thawngin avelngeihnâk le a rum tak takmi a zângfahnâk cu kan cungah a langhter khawh lai.

⁸ Zeitintiah zumhnâk thawngin zângfahnâk i khamh nan si, cucu nanmah ta a si lo, Pathian thilpêk a si,

⁹ tuahsernâk in a si lo, culoahcun, an ruam a kai sual lai.

¹⁰ Thilṭha tuah dingah Krih Jesuh ah sermi kan si i Amah kutchuak kan si, cu thilṭha tuah cu kan umnâk dingah Pathian nih a rak timhlamh ciami a si.

¹¹ Cucaah nannih, taksa in Gentel, taksa kut i cuarpartanmi nih, ‘cuarpartanlomi’ an ti tawnmi hna,

¹² kha cân ah khan Krih tel loin nan um i Israel khua le ram le kamhmi biakam chungin khual nan si i hi vawlei ah Pathian ngei lole ruahchannâk ngei loin nan rak um.

¹³ Asinain atu cu Krih Jesuh ah, nannih lam hla pi ah a ummi kha Krih thisen in nai te ah chiah nan si cang.

¹⁴ Zeitintiah Amah hrimhrim cu kan daihnâk, a lai fangah ṭhennâk vanpang a hrawk i bu hnih kha bu khat ah a tuahtu a si,

¹⁵ phunglam le nawlbia le nawlpêk hna nih an chuahpi mi ralnâk cu a taksa in a hrawk i pahnih hna cu Amah ah mithar pumkhat ah ser in, daihnâk kha a ser,

¹⁶ cun i ralnâk kha thah piakin pahnih hna cu vailamtahnâk thawngin Pathian ah taksa pumkhat ah can terin i remṭhânnâk kha a tuah khawh lai.

¹⁷ Cun a ra i nannih hla piah a ummi le, annih nai teah a ummi hna sinah daihnâk an chimh hna.

¹⁸ Amah thawngin Pa sinah Thlarau pakhat in luhkhawhnâk kan ngei.

¹⁹ Cucaah atu ah cun, khual le mising nan si tilo i mithiang hna he laikhat le Pathian inn chungkhar nan si cang.

²⁰ Lamkaltu le Profet hna bunhmi lung cungah sakmi nan si, cu inn ah a biapi bikmi a kil lung cu Krih a si,

²¹ cu inn cu a ningpiin Amah ah pehtonh an si i Bawipa ah a thiangmi ṭempal ah a cang tawn,

²² nannih zong Amah ah Thlarau i Pathian umnâk dingah pehtonh i sakmi nan si.