EFESA 1 - Laibaibal Thiang (BSI)

¹ Paul Pathian duhning i Jesuh Krih Lamkaltu nih, Efesa khua i mithiang hna le Jesuh Krih ah zumhtlâk a simi hna sinah:

² Pathian kan Pa le Bawipa Jesuh Krih sinin zângfahnâk le daihnâk nan sinah um ko seh.

³ Thlarau lei thluachuahnâk phunkip Krih in vancung ramah thlua a kan chuahtu Kan Bawipa Jesuh Krih i a Pa le a Pathian cu thangṭhat in um ko seh;

⁴ Ahmai ah a thiangmi le sawi awk um lomi kan si khawh nâkhnga vawlei hram thawk hlan in Amah ah dawtnâk in a kan thim cang,

⁵ Amah duhnâk le ṭha a ti ningin, Jesuh Krih thawngin Amah fa bang i canter awkah a kan khaukhih cang,

⁶ a sunglawimi a zângfahnâk thangṭhat dingin cu zângfahnâk ah cun dawtmi ah Amah nih a kan cohlân.

⁷ A thisen thawngin Amah ah tlanhnâk le a rummi a zângfahnâk bangin sual ngaihthiamnâk kha kan co,

⁸ fimnâk le khuaruahthiamnâk vialte in kan sinah zângfaknâk cu liam thluahmah in a kan pêk.

⁹ Amah nih â tinhning le lawmhning tein, a duhnâk biathli cu kan sinah a phuan cang,

¹⁰ A remruatmi cân a tlin tikah, Amah ah zeizong vialte, vanah a ummi le vuleiah a ummi he Krih ah a pumh dih khawh nâkhnga.

¹¹ Amah ah rocotu sinâk zong kan co cang, cucu Amah duhning le remruat ningin zeizong vialte tuahtu tinh ningin ruahciami a si,

¹² kannih Krih â bochan hmasatu hna hi a sunparnâk thangṭhattu kan si nâkhnga.

¹³ Nannih zong biatak bia nan khamhnâk thawngṭha kha nan theih hnu ah Amah kha nan i bochan i zumh zong nan zumh hnu ah, kamhmi Thiang Thlarau in hmelchunh nan si.

¹⁴ cucu a ta dingah cawkmi, tlanh an si hlan tiang a sunparnâk thangṭhat dingah, ro cotu kan sinâk ca i hamchungnâk a si.

¹⁵ Cucaah, kei zong nih Bawipa Jesuh nan zumhning le mithiang vialte nan dawtnâk ka theih hnu ah,

¹⁶ thla ka camnâk ah nanmin chimin nan caah lawmhnâk bia chim kha ka ngol lo.

¹⁷ Kan Bawipa Jesuh Krih Pathian, sunparnâk Pa nih Amah hngalhnâk ah, biaphuannâk le fimnâk thlarau an pêk khawh hna nâkhnga,

¹⁸ nan lungthin mit dei terin, Amah kawhnâkah ruahchannâk le, mithiang hna ro coding a sunlawi ning le a rumning kha nan hngalhfian khawh lai,

¹⁹ cun khuaruhhar a thiltikhawhnâk i rian a ṭuanning le, kannih zumtu hna ca i a ṭhawnnâk a lianhnganning hi zeibantuk set dah a si,

²⁰ Krih ah khan zeitiset in dah a ṭuan i thihnâk in a thawhter i vancung ah a orhlei tiangah a ṭhutter ning le,

²¹ bawinâk, nawlngeihnâk, ṭhawnnâk le uknâk vialte, hi vawlei lawnghmanh si loin a um laimi vawlei zongah min bunhmi vialte lakah cungnung bik a si.

²² A ke tangah thil vialte a chiah i Amah cu zeizong vialte cungah lu bik si dingin khawhran hna sinah a pêk,

²³ kawhhran cu Amah pum, zeizong i zeizong ah a khat dihmi Amah tlamtlinnâk kha a si.