BIAPHUAN 8 - Laibaibal Thiang (BSI)

¹ Chinchiahmi pasarihnâk a hun phoih tikah, suimilam a cheu hrawng vancung cu a dai.

² Cun Pathian hmai i vanmi pasarih kha ka hmuh, an sinah muko pasarih an pêk hna.

³ Cuticun vanmi dang, rimhmui khanghnâk suikhengkur put in a ra i biakṭheng pawngah a dir. Rimhmui khangh ding tampi kha an pêk, cucu bawithutdan hmai i sui biakṭheng cungah mithiang vialte thlacamnâk he a pêkchanh nâkhnga caah a si,

⁴ Cun rimhmui khanghmi khu le mithiang hna thlacamnâk cu vanmi hna kut in Pathian hmaiah a kai.

⁵ Cuticun vanmi nih rimhmui khanghnâk khengkur kha a lak i biakṭheng i meiin a khahter i vulei ah a thlâk. Cun khuari le nimtlau le lihnin thawng kha a hung um.

⁶ Cutincun vanmi pasarih, muko pasarih â kenmi hna nih tum awkah timhcia in an um.

⁷ Vanmi pakhatnâk nih a hun tum: Cun mei le rial nih a zulh i thisen he â cawhmi kha vulei ah a sur. Vulei cheuthum cheukhat kha a kâng dih, thingkung hna zong cheuthum cheukhat a kâng dih i ram hring vialte zong a kâng dih.

⁸ Vanmi pahnihnâk nih a hun tum i a nganmi tlang bantukin a kâng hluahmahmi mei kha rili chungah an hlawnh i rili cheuthum cheukhat kha thisen ah â cang dih.

⁹ Cun rili chung i nunnâk ngeimi cheuthum cheukhat kha an thi dih, tilawng hna zong cheuthum cheukhat hrawh an si.

¹⁰ Vanmi pathumnâk nih a hun tum i a ngan ngaimi arfi, meifar bangin a alhmi hi van in a rung tla i tiva cheuthum cheukhat le tikhor ah an tla.

¹¹ Cu arfi min cu “Khâ” ti a si. Cuticun ti cheuthum cheukhat kha a khâ dih i ti cu a khât tuk caah mi tampi an thi,

¹² Vanmi palinâk nih a hun tum i ni le thlapa le arfi kha cheuthum cheukhat cio an mui. Chun ah cheuthum cheukhat cu a ceu ti lo. Cubantuk ṭhiamṭhiam in zan zongah a si.

¹³ Cun ka hun zoh i mupi van i a zuangmi nih awthang ngaiin lei i a ummi hna caah ngaihchia a si, ngaihchia a si, ngaihchia a si, zeicatiah a tângmi vanmi pathum hna nih muko an tum`hân rih lai caah tiah, a ti kha ka theih.