BIAPHUAN 5 - Laibaibal Thiang (BSI)

¹ Cun bawiṭhutdanh i a ṭhumi orhlei kutah cazual, a chunglei le lenglei i ṭialmi chinchiahnâk pasarih i khenhchihmi kha ka hmuh.

² Cuticun a ṭhawng ngaimi vanmi pakhat nih aw thang ngaiin, “Cauk hi phoih i a chinchiahnâk hna on awkah â tlakmi ahodah a um? tiah a au kha ka hmuh.

³ Vanah siseh, vulei ah siseh, vulei tang zongah zualmi cauk kha a ong khomi an um lo i a chunglei a zoh khomi zong an um lo.

⁴ Cazual kha ong i rel awk le, a chunglei zong zoh awk â tlakmi ahohmanh an umlo caah ka ṭap thluah mah.

⁵ Asinain upa lakah pakhat nih ka sinah, “Ṭap hlah, ngaihmanh Chiandeih, Judah phun chungmi David hrampi nih cazual cu ong ding le a chinchiahnâk pasarih kha phoih dingin a tei cang,” tiah a ti.

⁶ Cun ka hun zoh i ngaihmanh, bawiṭhutdan le thilnung pali hna le upa hna umnâk laifang ah thah ciami Tuufano bantuk, ki pasarih le mit pasarih a ngeimi a dir kha ka hmuh, cu mit pasarih hna cu Pathian Thlarau pasarih leicung dihlak i thlahmi kha an si.

⁷ Cuticun Ara i bawi`hutdan ah a ṭhumi orhlei kut i cazual kha a lâk.

⁸ Cazual a lâk tikah thilnung pali le upa kul le li hna cu Tuufano hmaiah an bawk i tingtang le zihmui in a khatmi sui khengkur an i put cio, cu zihmui cu mithiang hna thlacamnâk a si.

⁹ Hlathar an sa i, “Nangmah cu cazual kha la in, a chinchiahnâk kha phoihawk ah nâ tlak. Zeitintiah thah in na um cang i phunkip, holhkip, mikip le hrin kip chungin Pathian caah na thisen in na tlanh cang hna.

¹⁰ Kan Pathian caah siangpahrang le tlângbawi ah na canter hna. Leicung kha kan uk hna lai,” tiah an ti.

¹¹ Cuticun ka hun zoh i bawiṭhutdan le thilnung hna le upa hna umnâk velchum ah vanmi tampi aw ka theih, an tamning cu a thong thongin thong tampi an si.

¹² Cuhna nih awthang piin, thah ciami Tuufano cu thiltikhawhnâk, rumnâk, fimnâk, ṭhawnnâk, thangṭhatnâk, sunparnâk le thluachuahnâk kha co awkah â tlâk tiah an ti.

¹³ Cun sermi thil vialte van i a ummi le vawlei i a ummi le vawlei tang i a ummi le rili ah a ummi vialte cuka i a ummi vialte nih, “Bawiṭhutdanh i a ṭhumi le, Tuufano sinah, thluachuahnâk, thangṭhatnâk, sunparnâk le biaceihnâk kha zungzal in zungzal tiang um ko seh,” tiah an chimmi kha ka theih.

¹⁴ Cuticun thilnung pali hna nih, “Amen” tiah an rak ti. Upa hna zong nih bawh buin zungzal in zungzal tiang a nungmi kha an biak.