BIAPHUAN 21 - Laibaibal Thiang (BSI)

¹ Cubangin van thar le lei thar kha ka hmuh, zeitintiah van hmasa le lei hmasa cu an um ti lo. Rili zong a um ti lo.

² Cuticun kei Johan nih, a thiangmi khualipi, Jerusalem thar cu, a vâ hmuh awkah dawh ngaiin ṭamhmi mo bantukin Pathian sin in van i a rung ṭum kha ka hmuh.

³ Vanin a thang ngaimi aw nih, “Zohhmanh, Pathian biakthlâm cu minung sinah a um ai, Anih cu an sinah a um lai, annih cu ami le an si lai. Pathian hrimhrim nih a umpi hna lai i an Pathian a si lai.

⁴ Cun an mit i mitthli vialte Pathian nih a hnawhpiak hna lai; thihnâk a um ti lai lo, ngaihchiatnâk le ṭahnâk zong a um ti lai lo. Fahnâk zong a um ti lai lo, zeitintiah thil hmasa hna cu an lo dih cang.

⁵ Cuticun bawiṭhutdan i a ṭhumi nih, “Zohhmanh, thil vialte a thar in ka ser dih cang.” Cun ka sinah, “Ṭial tuah,” zeitintiah hi bia hna hi biatak le zumhtlâk an si,” tiah a ti.

⁶ Cun ka sinah, “Lîm a si cang! Keimah cu Alpha le Omega, Hramthawknâk le Donghnâk. Ati a hâlmi kha nunnâk cerhti man lo tein ka pêk hna lai.

⁷ Teitu nih thil vialte hi an co dih lai, a Pathian ka si lai, amah cu ka fapa a si lai.

⁸ Asinain miralchia, zumlotu, fihnungmi, lainawngmi, horduh cuaimi, doihthiammi, milem biami hna le lih chimmi vialte umnâk ding cu mei le kât mei tili, thih voihnihnâk cu a si.

⁹ Cuticun vanmi pasarih lak i pakhat hremnâk i a khatmi hrai pasarih â putmi nih a hun ka chawnh i ka sinah, “Ra tuah, Tuufano nupi, a mo cu kan hmuh sak lai,” tiah a ti.

¹⁰ Cun anih nih a ngan i a sâng ngaimi tlâng ah Thlarau in aka kalpi, Pathian sin in van i a rungṭummi Khualipi lianngan, a thiangmi Jerusalem kha a ka hmuhsak,

¹¹ Pathian sunparnâk a ngeimi, a ceuning cu a sunglawi bik lungvar bantuk, jasper le crytal lungvar bantuk a si.

¹² Kutkâ hleihnih ngeimi a lianngan i a sângmi hau in kulhmi a si, cun kutkâ hram ah vanmi hleihnih le min ṭialmi kha an um, cu hna cu Israel miphun hleihhnih hna min an si;

¹³ nichuah lei ah kutkâ pathum, chak leiah kutkâ pathum, thlang leiah kutkâ pathum, nitlak leiah kutkâ pathum an um.

¹⁴ Cubangin khualipi nih hrambunhnâk hleihhnih a ngei, cuka ah Tuufano lamkaltu hleihnih hna min a um.

¹⁵ Cun aka chawntu nih khualipi kulhnâk le kutkâ hna tahnâk sui hluang kung a ngei.

¹⁶ Khualipi cu killi a ngei i a tung le avang â khat. Cun thluang kung cun khualipi kha atah i meng 1500 a si, a tung le a vâng le a sân lei kha â khat dih.

¹⁷ Cuticun kulhnâk vampang kha a tah i minung tahnâk ningin, cucu vanmi tahnâk zong a si i dong 144 a chah.

¹⁸ Kulhnâk vampang caah hmanmi cu jasper lungvar a si i khualipi cu a fiangmi thlalang bantuk sui thiang a si.

¹⁹ Khualipi vampang hrambunhnâk hna cu a sunglawimi lungvar a phunphun in ṭamhmi an si, hrambunh pakhatnâk cu jasper a si, pahnihnâk cu sapphire a si, pathumnâk cu chalcedony a si i palinâk cu emerald a si,

²⁰ panganâk cu sardonyx, paruknâk cu sardius, pasarihnâk cu chrysolite, pariatnâk cu beryl, pakuanâk cu topas, pahranâk cu chrysoprase, hleikhatnâk cu jacinth le hleihnihnâk cu amethyst lungvar an si.

²¹ Kutkâ hleihnih hna cu rili lungvar an si i kutkâ pakhat nih rili lungvar pakhat cio an ngei. Cun khualipi laifang lamhluan cu lanko i zohkhawhmi thlalang bantuk sui thiangmi a si.

²² Asinain a chungah ṭempal ka hmu lo, zeitintiah Zeizongtuahkho Bawipa Pathian le Tuufano cu an ṭempal an si.

²³ Khualipi nih ceuhtu dingah ni le thla a herh lo, zeitintiah Pathian sunparnâk nih a ceuh dih. Tuufa cu an meiin a si.

²⁴ Cun miphun hna sin in khamhmi hna cu a ceunâk ah an lêng lai, cun vawlei siangpahrang hna nih an sunparnâk le hmaizahnâk cu an i luhpi lai.

²⁵ A kutkâ hna cu chunah an khar bal lo ( cuka ah cun zan a um ti lai lo ).

²⁶ Cun miphun hna nih sunparnâk le upatnâk an luhpi lai.

²⁷ Asinain cuka ah cun a thurhnawmmi zeihmanh a lut lai lo, fihnungmi thil chuahtertu le lihchimmi zong an lut lai lo, Tuufano Nunnâk Cauk i min ṭialmi lawng an lut lai.