BIAPHUAN 18 - Laibaibal Thiang (BSI)

¹ Hithil hna hnu ah vanin a rungṭummi vanmi dang, nawlngeihnâk lianngan a ngeimi kha ka hmuh i vulei hi a sunparnâk nih a ceuh dih.

² Cun thiltikhawhnâk he thang ngaiin, “Babilon khua lianngan cu a tlu cang, a tlu cang, khuachia hna umnâk, thlarau thûrhnawmmi khumhnâk, a thûrhnawmmi vate le fih a nungmi umnâk ah â cang ai!

³ Zeitintiah a horduhcuai thinhunnâk misur cu miphun vialte nih an ri cang, vawlei i siangpahrang hna nih an sualpi i vawlei i chawlettu hna nih nuam a tawlnâk cu an rumpi cang,” tiah a au.

⁴ Cun vanin aw dang ka theih, “Kami le hna, kha nu kha chuahtak u, culoahcun a sualnâk ah nan i tel sual lai i a dântatnâk kha nan i hrawm ve sual lai.

⁵ Zeitintiah a sualnâk nih van an phân i Pathian nih a sualpalhnâk kha a philh hna lo.

⁶ Nan cungah a tuah bangin amah cung zongah tuah ve u, a tuahmi kha a lehhnih in lehrul u law, din awk hrai a cawhmi cu a lehhnih in cawhpiak ve u.

⁷ Amah le amah â sunparter i â nomhter bantuk khan ngaihchiatnâk le temtuarnâk in cham ve u; zeitintiah a lungin, ‘Siangpahrang nu bangin ka ṭhu i nuhmei ka si lo, ngaihchiatnâk zong ka tong lai lo,’ tiah a ti.

⁸ Cucaah nikhat chungah amah hremnâk ding thihnâk, zûnngaihnâk le pâmnâk kha a phân lai. Cun a dihumnâk in mei i khangh a si lai, zeitintiah amah biaceihtu Bawipa Pathian cu a ṭhawngmi a si.

⁹ Nupa sualnâk a tuahpitu vawlei siangpahrang hna nih amah khanghnâk meikhu kha an hmuh tikah a zûn ngai in an ṭah lai.

¹⁰ Amah hremnâk cu ṭih in hlapi ah an dir lai i, ‘Ala, ala, a liangngan Babilon khualipi, a ṭhawngmi khualipi kha! Suimilam pakhat chungah na biaceihnâk a phân ai.’

¹¹ Cun vawlei i chawlettu hna nih ngaihchia in an ṭah lai, zeitintiah ahohmanh nih a thil an caw ti lo;

¹² an chaw lehnâk sui le ngun, mansungmi lungvar a phunphun, lahmang `hia le puansen, maimaw puan le puan sekduk, rimhmuimi thing a phunphun le, vuiho in sermi a phun phun le, a sunglawimi thing a phunphun in sermi le sailungvar, thir le dar in sermi hna,

¹³ nakzik le musala le zihmui, mura le frankinsen zihmui, misur hang le chiti, changvut le buh, caw le tuu, rangtûm le lêng hna, pum le minung nunnâk an zuarmi hna he.

¹⁴ Thingthei na duh tukmi hna kha nasin in an tlau dih cang i a thawmi hna le â dawhmi thil hna zong nasin in an tlau dih cang, zeitikhmanh ah na hmu ṭhân ti lai lo.

¹⁵ Cu thil hna i chawlettu hna le amah sin in a rummi hna cu cunu temtuarnâk cu ṭih in hlapi ah dir in ngaihchia in an ṭap lai,

¹⁶ ‘Ala, ala, lungvar a phunphun le sui le ngun, puan hmangṭhia le maimaw puan le puan senduk in â thuammi khualipi kha!

¹⁷ Suimilam pakhat chungah kha tluk rumnâk lianngan kha zeihmanhlo ah a cang ai, an ti lai. Tilawng uktu hna le tilawng i khualtlawngmi hna, rili cung i chawlet chawhrawl mi hna nih hlapi ah dir in

¹⁸ amah khanghnâk meikhu an hmuh tikah, ‘Hitluk khua liangngan hi zeidah a can?’

¹⁹ Anlu ah leidip an i phulh i, ngaihchia le ṭahbu in, ‘Ala, ala, khatluk khua lianngan, rili ah tilawngin khual a tlawngmi vialte nih a chawva an i rumpimi kha! Suimilam pakhat ah hrawh cikcek a si ai.’

²⁰ “Maw van, nannih lamkaltu le profet a thiangmi hna, i lawm tuah u, zeitintiah Pathian nih nanmah ai awh in a lehrulh ve cang!” tiin.

²¹ Cuticun a ṭhawng ngaimi vanmi pakhat nih facang rialnâk lung bantuk lung nganpi a cawi i rili chungah a hlawnh, “Hibantuk in Babilon khualianngan cu hlawnh a si lai i hmuh a si ti lai lo,” tiah a ti.

²² Tingtang le thanglawi muko tum tawng hna na sin in theih a si ti lai lo. Na chungah zungthiammi hna zong hmuh an si ti lai lo, na chungah facang rialnâk thawng zong theih a si ti lai lo.

²³ Na chungah meiin zong van a si ti lai lo, mo ngeitu le mo thawng zong na chungah theih a si ti lai lo. Zeitintiah na chawlettu hna cu vawlei i mi lianngan hna an si i na doihthiamnâk in miphun vialte kha hlen an si.

²⁴ Cun a chungah profet hna le mithiang hna le vawlei ah an thahmi vilate hna thisen kha hmuh a si.