BIAPHUAN 17 - Laibaibal Thiang (BSI)

¹ Cuticun vanmi pasarih hrai pasarih â kenmi hna lak i pakhat nih aka chawnh i, “Ra law, ti tampi cungah a ṭhumi a lianngan hlawhhlangnu biaceihnâk cu kan hmuhsak lai,

² vulei siangpahrang hna he nupa sualnâk an tuah, cun leicung i a ummi hna kha a horduhcuainâk misur zu in ritter an si,” tiah a ti.

³ Cuticun amah nih ramcar ah Thlarau in aka kalpi. Cun lu pasarih le ki pahra a ngei i Pathian thangchiatnâk min lawng tein a khatmi sen-eu sahrang cungah â citmi nu pakhat kha ka hmuh.

⁴ Cu nu cu sen-eu le senduk in â thuam, sui le lungvar le rili lungvar man sung ngaimi in â ṭamh, a kut in fihnung le thurhnawmhnâk in a khatmi horduhcuainâk hrai â put.

⁵ Cun a cal ah hi min hi â ṭial. A LIANNGANMI BABILON, HLAWHHLANG HNA LE VULEI I FIH A NUNGMI HNA NU BIATHLI, tiin.

⁶ Cu nu cu mithiang hna thisen le Jesuh ca i martar hna thisen in a rît kha ka hmuh. Cun cunu ka hmuh tikah, ka khuaruah a har tuk i ka ar ko.

⁷ Asinain vanmi nih ka sinah, “Zeiruangahdah na khuaruah a har? Hi nu biathli le â citmi sahrang lu pasarih le ki pahra ngeimi biathli kan chimh lai.

⁸ Na hmuhmi sahrang a rak um cang i a um ti lomi kha, taw a ngeilo khor in a rak chuak i lohtlaunâk i a kal hngami a si. Cun vawlei i a ummi vawlei serka in Nunnâk Cauk ah min ṭial lomi hna nih sahrang a rak um cang i a um ti lomi kha an hmuh tikah mak an ti lai.

⁹ “Hika ah hin fimnâk lungthin ngeih a herh: Lu pasarih hna cu minu ṭhutnâk tlâng pasarih an si.

¹⁰ Siangpahrang pasarih zong an si. Panga hna cu an tlu cang, pakhat cu a um ko rih, cun pakhat cu a um rih lo. Cun a um tikah, cân tawite lawng a si lai.

¹¹ Sahrang a rak um cang i a umti lomi zong kha a pariatnâk a si, cun pasarih hna chungin a si i lohtlaunâk ah a kal ve lai.

¹² Ki pahra na hmuhmi kha siangpahrang pahra hna pennâk a ngei rih lomi kha an si, asinain sahrang he nawlngeihnâk suimilam pakhat chung an ngei lai.

¹³ Lungkhat in an um lai i an nawlngeihnâk le ṭhawnnâk cu sahrang kha an pêk lai.

¹⁴ Cuhna nih Tuufano kha an doh lai i Tuufano nih a tei hna lai, zeitintiah Amah cu bawi hna Bawi le siangpahrang hna Siangpahrang a si; cun a sinah a ummi hna cu zumhawktlak le thimmi tiah kawh an si lai.

¹⁵ Cuticun ka sinah, “Hlawhhlangnu ṭhutnâk ti tampi na hmuhmi kha, mizapi, mibu hna le miphun hna le holhphun kip kha an si.

¹⁶ Cun sahrang cung i na hmuhmi ki pahra hna nih khan hlawhhlang nu kha an huat lai i taklawng le zeihmanhlo ah an canter lai, a sa an ei lai i mei in an khangh lai.

¹⁷ Zeitintiah Pathian bia a tlin hlan tiang, an pennâk kha sahrang sinah pêk dingin, Pathian nih â tinhmi kha tlinter awkah an lungthin ah ruahnâk pakhat a ngeihter hna.

¹⁸ Cun minu na hmuhmi kha khua lianngan, vawlei siangpahrang hna cung i uktu kha a si.