BIAPHUAN 14 - Laibaibal Thiang (BSI)

¹ Cun ka hun zoh i Zion tlâng Tuufano a dirmi le a pawng i mi 144000 an cal ah a Pa min ṭialmi kha ka hmuh hna.

² Cun vancung in thawng, ti tampi a luangmi thawng le khuari thawng ka theih i tingtang tumtu hna nih tingtang an tum thawng bantuk zong a si.

³ Bawiṭhutdan hmai le thilnung pali le upa hna hmai ah hlathar bantuk khi an sak i vawlei in tlanhmi 144000 hna dah ti lo ahohmanhnih cu hla cu an cawng kho lo.

⁴ Cu hna cu nu ah â thurter lomi, a thiangmi an si. Cu hna cu Tuufano kalnâk pauh ah a zultu an si. Cu hna cu Pathian le Tuufano caah theitlai hmasa bik si dingin minung hna chungin tlanhmi an si.

⁵ Cun ankâ chungin hlennâk a chuak bal lo, Pathian bawiṭhutdan hmai hmanhah sawi awk um lomi an si.

⁶ Cuticun vanmi dang van i a zuangmi kha ka hmuh, amah cu vawlei i miphun kip le hrinkip le holh phunkip le mikip hna sinah zungzal thawngṭha bia aupitu dingah a zuangmi an si,

⁷ thang ngai in a au i, “Pathian cu ṭih u law Amah cu sunparnâk pe u, zeitintiah bia a ceih cân cu a phân cang; van le rilipi le cerhti hna a Sertu cu bia tuah u,” tiah a ti.

⁸ Cun vanmi dang nih a rak zulh ve i amah nih Babilon cu a tlu cang, a liannganmi khualipi, a horduhcuainâk ruangah miphun vialte thinhunnâk zu a dintertu cu” tiah a au.

⁹ Cuticun vanmi pathumnâk nih a rak zulh ve i aw thang ngai in, “Mizei pauh nih sahrang le a lem bia in an cal ah siseh an kut ah siseh chinchiahnâk an ngeih ahcun,

¹⁰ amah hrimhrim zong nih Pathian thinhunnâk misur hang, a thinhunnâk hrai zeihmanh cawh lomi zu hrim hlennâk kha a din lai. Tuufano le vanmi thiang hna hmaiah mei le kat in hrem a si lai.

¹¹ Cun anmah dântatnâk meikhu cu zungzal in zungzal tiang van leiah a kai lai, sahrang le a lem a biatu hna le a min chinchiahnâk a putu vialte dântatnâk kha chunzan hlan in dinh ti a um lai lo,” tiah a au.

¹² Hika ah hin mithiang, Pathian nawlpêk le Jesuh zumhnâk â nunpitu hna caah inkhawhnâk a um.

¹³ Cuticun vanlei in aw nih, “Hiti hin ṭial tuah, atu thawk in mithi, Bawipa i a thimi hna cu mi vanṭha an si,” “A si” an thabâtnâk cu an dinhtâk cang lai, cun an tuahsernâk tu nih a zulh ve cang hna lai, tiah Thlarau nih a ti.

¹⁴ Cuticun ka hun zoh i khuadawm râng ka hmuh i khuadawm cungah Mi Fapa bantuk hi a ṭhu, A lu ah suiluchin â chinh i a hâr ngaimi fa-ah kha â put.

¹⁵ Cun ṭempal in vanmi dang a rak chuak i khuadawm cung i a ṭhumi sinah aw thang ngai in, “Na fa-ah kha chuah law at hna, zeitintiah na caah ah cân a phân cang, zeitintiah vawlei i facang hna khi an hmin cang,” tiah a ti.

¹⁶ Cuticun khuadawm cung i a ṭhumi nih a fa-ah cu leiah a thlâk i lei i facang kha an ah,

¹⁷ Cuticun vanmi dang van i ṭempal chungin a rak chuak, anih zong nih a hâr ngaimi fa-ah kha â put.

¹⁸ Cun vanmi dang mei cungah nawlngeitu kha biakṭheng chungin a rak chuak, a hâr ngaimi fa-ah kengtu sinah aw thang ngaiin, “A hâr ngaimi na fa-ah kha chuah law lei i misur bawr hna khi at hna, zeitintiah misur thei hna khi an hmintuk cang,” tiah a au.

¹⁹ Cuticun vanmi nih a fa-ah kha leiah a thlâk i lei i misur kha Pathian thinhunnâk misur nennâk khor chungah an thlâk hna.

²⁰ Khualipi hauleng i misur nennâk khor ah an lamhchih hna, cun misur nennâk khorchung cun thisen a rak chuak i rang chakbanh tiangin a thuk i meng zahnih tiangin a luang.