3 JOHAN 1 - Laibaibal Thiang (BSI)

¹ Upa nih, Dawtmi Gaias, biatak i ka dawtmi sinah:

² Dawtmi, na nunnâk nih thluachuah a hmuh bantukin, na ngan a dam i a lam kip in thluachuah na hmuh nâkhnga thla ka cam.

³ Zeitintiah unau a rami hna nih nangmah i biatak a umnâk kong le na nunpinâk kong an chim tikah ka lawm ngai ngai.

⁴ Ka fale biatak ah an um tiah ka hngalhmi hlei in lawmhnâk dang ka ngei hlei lo.

⁵ Dawtmi, unau hna le khual sin i na tuahmi kipah zumh awktlâk in rak tuah ko;

⁶ cuhna nih dawtnâk i na tuahmi kong kha kawhhran hna hmai ah an chim cang, Cuhna cu khual an tlawn vima nâk dingah Pathian mi le hna tuahawk a sibangin na rak bomh hna a ṭha lai.

⁷ A min ruangah a chuakmi an si, Gentel mi hna sin in zeihmanh bomhnâk an hmu fawn lo.

⁸ Cucaah cubantuk mi hna cu biatak i rian kan ṭuanpi hawi an si khawh nâkhnga kan cohlân awk an si.

⁹ Kawhhran hna sinah ca ka kuatcang, Daiothefes an lak i cungnun a duh ngaimi nih khan a kan cohlâng duh lo.

¹⁰ Cucaah ka rat ahcun, a dik lomi thil a tuahmi hna kha ka phuan dih lai. Bia ṭha lo lawng tein kan kong a ceih. Cu lawng si loin unau hna a rak cohlang duh lo, cohlan a duhtu hmanh a kham hna i kawhhran in a dawi hna.

¹¹ Dawtmi, thil ṭha lo cu i zoh chunh hlah. A ṭhami lawnglawng rak i zoh chunh. Ṭhatnâk tuahtu cu Pathian ta an si i sualnâk a tuahtu nih Pathian a hmu bal lo.

¹² Demetias nih mi vialte mithmai ṭha a hmuh tawn, biatak i thangṭhat zong a co. Kannih zong nih kan thangṭhat i kan thangṭhatnâk zong a dik tiah na hngalh ko.

¹³ Nan sinah thil tampi ṭial awk ka ngei ko nain catlap le cati in ṭial ka duh hna lo,

¹⁴ a rauh hlan ah nangmah hmuh kâ ruahchan i hmai tonh tein bia kan i ruah lai. Daihnâk na sinah um ko seh. Kan hawi le nih na kut an tlaih. Kan hawi le kha min chim in an kut ka tlaih piak hna.