2 JOHAN 1 - Laibaibal Thiang (BSI)

¹ Upa nih, thimmi nu le a fale hna sinah, biatak i ka dawtmi hna, keimah lawng hmanh si loin, biatak a hngaltu vialte hna sin zongah,

² biatak kan sinah a hmunmi le zungzal in kan sinah a um lai caah:

³ Pa, Pathian le Bawipa Jesuh Krih, Pa Fapa sinin zângfahnâk le velngeihnâk le daihnâk kha, biatak le dawtnâk in nansin ah um ko seh.

⁴ Pa sin in nawlpêk kan hmuh bang khan na fale lakah cheu khat biatak ah an um ti kha ka hmuh tikah kan i lawm ngai ngai.

⁵ Cun upat tlâk a simi nu, na sinah nawlpêk thar bangin ka ṭial lo, a hramthawk in kan ngeih ciami tu kha ka ṭial, pakhat le pakhat i daw dingin kan nawl.

⁶ Hihi dawtnâk a si, a nawlpêkmi bang i nun hi. Hihi a hramthawk in na rak theih cangmi nawlpêk cu a si, cuka ah rak um.

⁷ Zeitintiah hlengtu tampi, Jesuh Krih cu thisa in a ra tiah a pom lomi hna, vawlei ah hin an chuak cang. Cu hna cu hlengtu le Krih ralchanhtu cu an si.

⁸ Kan ṭuan ciami hna kha kan hloh lo i ṭuanman zong tling tein kan hmuh nâkhnga, rak i ral ring u.

⁹ Mizei pauh Krih cawnpiaknâk ah hmun loin a buartu nih cun Pathian an ngei lo. Krih cawnpiaknâk i a hmunmi lawng nih Pa le Fa an ngei.

¹⁰ Cubantuk cawnpiaknâk i ken loin nan sinah an rat ahcun, nan innah tlunter hna hlah u, biaṭha zong in rak chawn hna hlah u,

¹¹ zeitintiah biaṭha i a chawntu nih cun a sualnâk ah khan â tel ve tinâk a si.

¹² Nan sinah thil tampi ṭial ding ka ngei, catlap le cahang in ṭial ka duh lo, nan i lawmhnâk a tlin khawh nâkhnga, nan sin i rat i hmaitonh tein i kawmh i chim ka duh deuh.

¹³ Thim a si ve mi, na unau nu fale nih na kut an tlaih. Amen.