2TIMOTE 4 - Laibaibal Thiang (BSI)

¹ Pathian le Bawipa Jesuh Krih hmaiah a pennâk le mithi le minung hna biaceih awkah a lang laimi hmaiah nawl kan pêk:

² Bia cu chim! Cân â rem ah siseh, â remlo ah siseh timhcia in um ko. Lungsaunâk he cawnpiak hna law an lung pemh i zuamin chimhring hna law tha zong pe hna.

³ Zeitintiah cawnpiaknâk dik an ngaih duhlo cân kha a phân lai. An hnâ kha a za i anmah nih ngaih an duhmi cawnpiaktu kha an sawm hna lai,

⁴ biatak in an hnâ an mer lai i ṭawnchawmmi tuanbia lei ah an pial lai.

⁵ Nang tu cu zeithil pauh ah i ral ringin harnâk tuar law, evangelist rian hi ṭuanin na rian hi lîm i zuam.

⁶ Kei tu cu ka chuah cân a nai cang, raithawinâk ti bangin thlet awkah timh cia in ka um lio cân a si.

⁷ Raldohnâk ṭha cu ka tei cang, tlik zuamnâk ah a donghtiang ka tli cang i zumhnâk kha kâ tlaih cang.

⁸ Ahnubik ah dinnâk luchin cu ka caah chiah a si, cucu biaceihtu fel, Bawipa nih cu Ni ah aka pêk lai, kasin lawngah a si lai lo, Â langhnâk â ngaihmi vialte sin zongah a pêk lai.

⁹ Ka sinah ratzau i tim;

¹⁰ zeitintiah Demas nih atu chan vawlei a dawt caah a ka kaltâk, Thesalon khua ah a kal i Kresen cu Galati ramah a kal i Titas zong Dalmatai ramah a kal.

¹¹ Luka lawnglawng nih a ka umpi. Marka kha sawm law ratpi, zeitintiah amah cu hi rianṭuan nâkah ka caah san a tlai ngaingai.

¹² Cun Ṭaikhikhas cu Efesa ah ka thlah.

¹³ Na rat tikah Troas khua i Karpas sinah ka chiahmi angki-fual le cauk he khan ratpi, a hlei in saphaw cauk kha ratpi te.

¹⁴ Aleksandria Dar-soser pa nih khan fahnâk tampi a ka pêk. Bawipa nih a tuah ningin teirul cham te ko seh.

¹⁵ Nang zong khapa ah khan fakpi in i ralring, zeitintiah kan chimmi fak piin a ralchanh.

¹⁶ Kâ kilvennâk kachim hmasat lio ah dirpitu ahohmanh ka ngei lo, anka hlawt dih. Amawh tu cu phur hrâm hna hlah seh.

¹⁷ Asinain Bawipa nih a ka dirpi i thazâng a ka pêk, cuticun Gentel mi vialte theih khawh in thawngṭha ka chim khawhnâk cu a si. Cuhlei ah chiandeih kâ chungin khamh ka si.

¹⁸ Cun Bawipa nih sual rianṭuannâk vialte chungin a kan khamh lai i a vanlei pennâk ah him tein a kan phâkter lai. Amah sinah zungzal in zungzal tiang sunparnâk um ko seh. Amen!

¹⁹ Priska le Akuila, cun Onesfaras chungkhar kha an kut ka tlaih piak hna.

²⁰ Erastas cu Korin khua ah a um i Trofimas tu cu Miletas ah dam loin ka kaltâk.

²¹ Khuasik hlanah rat kha biatak in i tim. Eubalas le Pudens, Linas le Klaudia le unau vialte nih na kuat an in tlaih.

²² Bawipa Jesuh Krih na thlarau sinah um ko seh. Zângfahnâk na sinah um ko seh. Amen.