2TIMOTE 3 - Laibaibal Thiang (BSI)

¹ Asinain hihi philh hlah, ni hmahnung ahcun ṭih a nung mi cân an phân lai.

² Minung cu mah le mah â dawmi, phaisa a dawmi, tluangkhawn a hmangmi, miruamkai, Pathian thangchiattu, nu le pa nawl ngai lo, lawmh a hngal lomi le a tluangtlam lomi,

³ dawtnâk ngei lomi, ngaihthiam a duh lomi, mi kongcaih a hmangmi, â sum kho lomi, nun chiakha, ṭhatnâk a huami,

⁴ hlawt a hmangmi, lung khongmi, â uahmi, Pathian daw loin mah nomhnâk a daw deuhmi an si lai.

⁵ Pathian duh ngaimi an i lawhter lai, asinain a ṭhawnnâk an zum lai lo. Cubantuk mi hna cu hrial hna.

⁶ Zeitintiah cubantuk mi hna cu in kipah a lêng i zângdermi nu le sualnâk nih a nenhmi hna le duhnâk sual a phunphun i a rak tlu tawnmi hna hlengtu an si,

⁷ cuhna cu a cawng lengmang ko nain biatak a pemh lomi an si.

⁸ Janes le Jambres nih Moses an ralchanh bantuk khan, cubantuk mi hna nih biatak kha an doh, ruahnâk ṭhalo, zumhnâk kong i cohlan khawh lomi an si,

⁹ cu hna caah hmainawr khawh a si lo, zeitintiah Janes le Jambres bantuk khan, an hruhning cu mi vialte hmuh ah a lang te ko lai.

¹⁰ Asinain nang tu cu ka cawnpiaknâk le ka umtuning, ka tinhmi, ka zumhnâk, ka lungsaunâk le ka dawtnâk, ka inkhawhnâk le,

¹¹ serhsatnâk le harnâk inter ka sinâk kha na hngalh ko, Antiok le Ikonion le Lustra ah khan zeibantuk serhsatnâk dah ka ton kha na philh lo. Cu vialte chungin Bawipa nih a ka khamh.

¹² A si, Pathian-aṭanh i Krih Jesuh ah umpeng â timmi hna nih serhsatnâk kha an ton ko lai.

¹³ Asinain misual le a deu in a nungmi hna cu an sual chin lengmang lai, mi an hlen hna lai i anmah zong hlenin an um ve lai.

¹⁴ Asinain nang tu cu ahosinahdah na cawn kha hngal law, na cawnmi le na hngalhmi kha i nunpi,

¹⁵ zeitintiah Krih Jesuh zumhnâk thawngin khamhnâk hmu lakin an fimter khotu Cathiang kha, na ngakchiat lio tein na hngalh cang.

¹⁶ Cathiang vialte hi Pathian thawchuah hnawhmi an si i cawnpiaknâk le, chimhhrinnâk le, palhmi-remhnâk le dinnâk cawnpiaknâk caah a ṭhahnemmi a si,

¹⁷ Pathian-mi cu rianṭha vialte ṭuan awkah felfai tein tlamtlinter a si khawh nâkhnga.