2TIMOTE 2 - Laibaibal Thiang (BSI)

¹ Cucaah ka fapa Krih Jesuh i a ummi zângfahnâk ah hin ṭhawng ngaiin um ko.

² Cun hngalhpitu tampi hna le keimah sinin na theihmi hna kha midang a cawnpiak chin khotu zumhawktlâk sinah pe chin hna.

³ Cucaah Jesuh Krih ralkap ṭha bantukin harnâk kha lungsau in ing ko.

⁴ Ralkap i a latu lungton dingah ralkap i a um liomi nih raldoh lio ah nunchung khuasaknâk in hna an i hnawhter bal lo.

⁵ Cun minih tlikzuamnâk a ngeih tikah ningcang tein a tuah lo ahcun laksawng a hmu kho lai lo.

⁶ Taihmâk te i rian a ṭuntu, lo ngeitu nih theipar hmasa cu a co awk a si.

⁷ Ka chimmi hi ruat law Bawipa nih zeithilpauh ah theithiamnâk in pe ko seh.

⁸ Ka chimmi thawngṭha Jesuh Krih cu David tefa, thihnâk in a thoṭhânmi a si ti kha philh hlah,

⁹ zeitintiah cuthil ruangah sualnâk tuahtu bangin cikcin ṭembawh tiangin ka tuar, asinain Pathian bia tu cu ṭemkhawh a si lo.

¹⁰ Cucaah Krih Jesuh khamhnâk cu zungzal i lianngannâk he an hmuh ve nâkhnga thimmi hna ruangah thil vialte ka tuar tawn.

¹¹ Hihi zumhawktlâk bia a si: Zeitintiah Amah he kan thih ahcun Amah he kan nung lai.

¹² Kan tuar ahcun Amah he bia kan ceih lai. Amah kan hlawt ahcun Amah zong nih a kan hlawt ve lai.

¹³ Zumh tlâk loin kan um hmanh ah Amah cu zumhtlâk a si zungzal. Amah le Amah â hlaw kho lo.

¹⁴ Hi thil hna hi hngalhter ṭhân hna, santlai lomi a ngaitu hna caah lohtlaunâk lawng a phâk pitu pakpalawng bia i el lengmang lo dingin Bawipa hmaiah chimhring hna.

¹⁵ Pathian cohlan awktlâk si dingin i pe ko, biatak bia hmân tein ṭhen a thiammi rianṭuantu cu ningzah a herh lo.

¹⁶ Pathian ṭihzahlo bia vaivuan a chim tawntu kha hrial hna, zeitintiah Pathian-zeirellonâk ah an zual chin chin lai.

¹⁷ An cawnpiaknâk cu khensar bangin a karh lai. Humenia le Filet zong cu hna lakah an i tel ve,

¹⁸ cuhna nih biatak kha pialtâk in thawhṭhannâk cu a si diam cangmi bangin an cawnpiak i cheukhat zumhnâk an hrawh piak hna.

¹⁹ Asinain a fekmi Pathian lungphun cu a dirpeng ko, hi hmelchunhnâk hi a ngei: “Bawipa nih Ami le cu a hngalh” ti le, “Bawipa min a hlammi pauh nih sual kaltâk seh ti hi.”

²⁰ Asinain a ropi ngaimi in ah sui le ngun i sermi thil lawng an um lo, thing le tlâk i sermi zong an um ve, a sunglawimi an um lio ah a sunglawi lomi zong an um.

²¹ Cucaah a hnu deuh chungin â thiantermi hna cu a thiangmi ûm, Bawipa hman awktlâk, rianṭha vialte caah timh ciain a ummi, sunh lawihmi ûm an si.

²² Mino duhnâk kha zâmtâk law lungthin thiangin Bawipa kotu hna sinah felnâk zumhnâk dawtnâk le daihnâk kha dawi hna.

²³ Cun hruhthil le elhnialnâk ah i tel hlah, buaibainâk lawng a chuahter kha hngal ko.

²⁴ Bawipa sal caah buaibai awk a um lo, mi vialte cungah nunnem ngaiin cawnpiak khawh le inkhawh kha i zuam,

²⁵ toidornâk he anmah dohtu hna cu fianter hna seh, cuticun biatak an hngalh i an i ngaihchih tiang zongin Pathian nih a sian khawh ko,

²⁶ Cun Satan nih a duhnâk tuah awkah sal i a rak tlaihhna nâk chungin an lung a fim lai i rap in a foih hna nâk chungin an chuak ṭhân kho ko.