2TIMOTE 1 - Laibaibal Thiang (BSI)

¹ Paul Krih Jesuh ah a ummi nunnâk biakam ningin Pathian duhning i Krih Jesuh lamkaltu nih,

² Ka dawtmi fa Timote sinah kan Pa Pathian le kan Bawipa Krih Jesuh sinin zângfahnâk le velngeihnâk le daihnâk um ko seh.

³ Ka pupa nih an rak ṭuan tawn bangin chia le ṭha hngalhnâk thiang ngei in a rian ka ṭuanmi Pathian sinah lawmhnâk bia ka chim i chun zan hlanin ngol loin thla ka camnâk ah kan philh lo,

⁴ lawmhnâk in ka khah khawh nâkhnga, na mitthli kha hngal in hmuh kan duh hringhran ko.

⁵ Zumhnâk taktak nangmah i a um kha ka philh lo, cucu napi Lois ah a um hmasa, nanu Zunis zongah a um i nangmah zongah a um kha fiang tein ka hngalh;

⁶ Cucaah ka kut chuannâk thawngin nangmah ah a ummi thilpêk kha alhter dingin kan hngalhter ṭhân.

⁷ Zeitintiah Pathian nih ṭihnâk thlarau a kan pe lo, ṭhawnnâk dawtnâk le ruahnâk ṭha thlarau tu kha a kan pêk.

⁸ Cucaah kan Bawipa kong hngalhpinâk hi zahpi hlah, asiloah Amah ruangah thongah a tlami keimah zong hi ka zahpi hlah, thawngṭha ruang i temtuarnâk hi Pathian ṭhawnnâk bangin ka hrawmpi ve,

⁹ Amah nih kan tuahsernâk bang si loin Amah ruahning le zângfahnâk in a kan khamh i kawhnâk thiangin a kan kawh, cucu vawlei ser hlanin Krih Jesuh ah a kan pêk,

¹⁰ asinain kan khamhtu Krih Jesuh â langhnâk in atu ah a langhter. Amah nih thihnâk kha a hrawh i thawngṭha in nunnâk le thihkhawh lonâk kha a phâkter cang,

¹¹ cucu Gentel mi hna cawnpiak dingah lamkaltu le cawnpiaktu ah ruahmi ka si.

¹² Hiruangah dahkaw hi thil hna hi katuar cu, asinain ka ning a zak lo, zeitintiah ka zumhmi kha ka hngalh, A sin i ka chhiahmi kha cu Ni tiangin him tein a umter khawh ti kha ka hngalh.

¹³ Krih Jesuh i a ummi zumhnâk le dawtnâk in, a ngandammi cawnpiaknâk ka sin in na theihmi kha fek tein i tlaih.

¹⁴ Thilṭha na sin i chiahmi kha kanmah i a ummi Thiang thlarau in kilveng.

¹⁵ Asia ram i a ummi vialte nih anka mertâk dih ti kha na hngalh an lakah Figelas le Hermegenes zong an i tel ve,

¹⁶ Bawipa nih Onesifaras chungkhar sinah vêl a pêk, zeitintiah amah nih thazâng thar a ka pêk i ka cikcin zong a zahpi lo;

¹⁷ Rom i a rat lio zongah biatak chuah in a ka kawl i a ka ton.

¹⁸ Efesa khua i rian ka ṭuannâk ah a lam kip in a ka bomhning cu nang zong nih na hngalhfian, cu Ni caah Bawipa sin in vêl a hmuh khawh nâkhnga Bawipa nih pe ko seh.