1 PETER 5 - Laibaibal Thiang (BSI)

¹ Nan lakah upa hna, kei nan upat hawi, Krih tuarnâk hngalhpitu, sunparnâk a lang hngami cotu ding a simi nih hin tha kan pêk hna.

² Nan lak i Pathian tuurun kha kilveng hna u law, zohkhenhtu si ko u, tuahlo khawh lo bangin ruat loin, duhnâk taktak he, duhfah hakkauh ruangah si loin, lungtho te in ṭuan si seh,

³ asiloah nan ukmi hna cungah i bawiter hlah u, tuurun zohchunh awktlâk si kha i zuam u,

⁴ cun tuukhal hna Bawibik kha a langh tikah sunparnâk luchin a ziamkho lomi nan hmuh lai.

⁵ Cubantuk in nannih mino hna, upa hna tangah i dor u. Asi, nandihlak in i pumpeknâk lungput ngei u law, toidornâk in i thuam u. “Pathian nih porhlaw mi a doh hna i toidormi kha vel a ngeih hna.”

⁶ Cucaah a ṭhawngmi Pathian kut toi ah toidor tein um u law, Amah nih a cân a zat tikah an cawisan te hna lai;

⁷ Amah nih nan zawn a ruah caah, nan buainâk vialte Amah cungah chawnh u.

⁸ Lungfim tein um u law i ralring u, nan ral khuachia cu chiandeih a hrum-aimi bangin a ei khawhmi kawl ah â chawk lên ko.

⁹ Vawlei cung i nan unau hna zong nih hibantuk hi an tuar ve ti kha hngal in, zumhfehnâk he amah cu doh u.

¹⁰ Zângfahnâk vialte Pathian, zungzal a sunparnâk co dingin an kotu hna Krih Jesuh nih, cân tawite nan tuar hnu ah, tlam tlinter le fehter in, ṭhawnter le fek tein in dirter ko hna seh.

¹¹ Amah sinah sunparnâk le biaceihnâk cu zungzal in zungzal tiang um ko seh. Amen.

¹² Silvanas, zumh a tlâkmi unau i ka ngeihmi kut ah hin nanmah thazâng pêknâk bia, atu i nan dirnâk hi Pathian zângfahnâk dik a si ti kha hngalhternâk câ tawi tein ka rak kuat.

¹³ Babilon mi nanmah he thimmi nu nih hin nan kut an tlaih hna. Cubantukin ka fapa Marka zong nih nan kut an tlaih hna.

¹⁴ Dawtnâk hnamh in i hnamh u law nan kut i tlai cio u. Krih Jesuh i a ummi vialte sinah daihnâk um ko seh. Amen.