1 PETER 4 - Laibaibal Thiang (BSI)

¹ Cucaah Krih nih thisa in kan caah a tuar ruangah nannih zong cu lungput cu ngei ve u; taksa in a tuarmi hna nih cun sualnâk kha an ngol cang;

² cubantuk mi hna cu an nun chung vialte taksa duhnâk in an nung ti lo i Pathian duhning in an nung cang.

³ Zeitintiah Gentel mi hna duhnâk tuahnâk dingah, kan rak nunpimi hornâk, taksa duhnâk, zuritnâk, zuhmun i i nomhnâk, zudinṭinâk le fih a nungmi milem biaknâk chung i umnâk caah cuhlan kha za cang seh.

⁴ Cubantuk nomhhnaihnâk i nan i tel duh lomi hi mak an ti i nan thang tu an in chiat hna.

⁵ Cuhna nih cun mithi le minung hna biaceih awk ah timhcia in a ummi hmai ah anmah kong an i chim cio te lai.

⁶ Hiruangah hin mithi hna sin zongah thawngṭha chim a rak si kha; taksa in a ummi minung hna bangin ceihpiak an si lai, asinain thlarau lei ah Pathian duhning in an nun khawh nâkhnga.

⁷ Thil vialte donghnâk a nai cang caah, thla nan cam khawh nâkhnga i bia takin i ralring u.

⁸ Cun thildang vialte nâk in pakhat le pakhat i dawt hi rak uar bik ko u, zeitintiah dawtnâk nih sualnâk tampi a khuh tawn.

⁹ Phunzai loin pakhat le pakhat i cohlang u.

¹⁰ Pathian zângfahnâk phun tampi zohkhenhtu nan si bangin, thilpêk nan co ning cio in pakhat le pakhat rian i ṭuan piak u.

¹¹ Jesuh Krih thawngin Pathian cu zeizong vialte ah thangṭhat i a um khawh nâkhnga, mi zei pauh nih phung a chim ahcun Pathian chimning tein chim seh, mizei pauh nih rian a ṭuan ahcun Pathian nih ti khawhnâk a pêk ning tein ṭuan seh, sunparnâk le biaceihnâk cu zungzal in zungzal tiang Amah ta a si. Amen.

¹² Ka dawt le hna nan lakah a har tak takmi hniksaknâk a tlungmi kha khuaruahhar ngai mi thil a phânmi ah ruat hlah u.

¹³ Krih teminnâk nan i hrawmhnâk a si tiah ruat in i lawm deuh u, cuticun a sunparnâk kha langhter a si tik ah lunglomh nâkin nan khat te lai.

¹⁴ Krih min ruang i sik nan sin ahcun nan van a ṭha, zeitintiah sunparnâk Thlarau, Pathian Thlarau kha nan cungah a um. Anmah leiah Amah cu thangchiat a sinain nanmah leiah Amah cu thangṭhat a si.

¹⁵ Asinain nan tuar chan cu lainawn ruang le, thilfir ruang le, Ṭhatlonâk tuah ruang le, a herh lo i midang kongah nan i thlak ruangah sihlah seh.

¹⁶ Mizei pauh Kristian a si ruangah a tuar a si ahcun, ningzak hlah seh, Pathian thangṭhatnâk tu ah hmang deuh seh.

¹⁷ Zeitintiah biaceihnâk cu Pathian chungkhar ah hin thawk a za cang, kanmah hmanh i a thawk ahcun, Pathian Thawngṭha zum duh lo hna donhgnâk cu zeitlukdah a si te lai?

¹⁸ Cubangin “Miding hmanh khamh fangfang a si ahcun, Pathian-zeiah a rel lomi le misual cu khuazeiahdah a si kun lai?”

¹⁹ Cucaah Pathian remti ningin a tuarmi hna caah thilṭha tuah in an thlarau kha zumh a tlâkmi Sertu sinah chân seh.