1 PETER 1 - Laibaibal Thiang (BSI)

¹ Peter, Jesuh Krih lamkaltu nih, Pontas, Galitia, Kapadosia, Asia le Bithinia ram i â ṭhekmi,

² Jesuh Krih thisen thehnâk pom dingin Thlarau i thiantermi hna le, Pa Pathian hngalh chungmi bangin thimmi hna sinah, zângfahnâk le daihnâk karhter in um ko seh.

³ Kan Bawipa Jesuh Krih Pathian le Pa cu thangṭhat in um ko seh, Amah nih a tammi a vêl thawngin thihnâk in Jesuh Krih a thawhṭhânnâk thawngin ruahchannâk nung hmu dingin a kan hrin ṭhân,

⁴ hrawhkhawh a si lomi le thûrter lomi, a ziamkho lomi ro cu nan caah vanah chiahpiak nan si,

⁵ zumhnâk thawngin khamhnâk, cân hmadung i langhter awkah timh ciami cu co dingin Pathian ṭhawnnâk in kilven nan si.

⁶ Cu thil ah nan i lawm ngaingai, atu ah cân tawite chung, tukforhnâk ruangah nan ngaih a chia;

⁷ a taktak a simi nan zumhnâk cu, a rawk khomi sui mei in hniksak cangmi nâkin a sung lawi deuh, cucaah Jesuh Krih a rat tikah thangṭhat le upatnâk le sunparnâk he hmuh nan si khawh nâkhnga,

⁸ Amah cu nan hmu lo nain nan dawt, atu ah nan hmu lo nain Amah cu nan zumh, cucaah nan zumh chan nan thlarau khamhnâk kha nan hmuh caah,

⁹ holh in chim khawh lomi le sunparnâk in a khatmi lawmhnâk in nan i lawm.

¹⁰ Nan cungah a phânmi zângfahnâk hi profet hna nih an rak chimchung i hi khamhnâk kong hi ṭha tein an rak dothlatmi a si.

¹¹ Krih nih a teminnâk ding le, cuhnu ah sunparnâk ahmuh lai ding hna cu, zeibantuk set dah a si lai i zeitik cân set ahdah a si lai tiah an rak kawl lio ah an chung i Krih Thlarau nih a hlan kan in a rak hngalhter cang hna.

¹² Cuhna nih anmah ca si loin, kanmah ca tu ah rian an rak ṭuan, Van in thlahmi Thiang Thlarau thawngin nan sinah thawngṭha a chimtu hna nih khan cucu an in chimh hna. Cucu vanmi hna hmanh nih hmuh an duhmi cu a si.

¹³ Cucaah a herhmi pauh ṭuan awkah nan ruahnâk cu timhcia in um sehlaw, mah le mah i tei in, Jesuh Krih a langhtikah, nan sinah a run phorh laimi zângfahnâk cungah nan ruahchannâk kha bunh u,

¹⁴ nawlngaimi fa bangin, hngalh lo ruang i hlanlio pumsa duhnâk nun hlun ah khan um ti lo in,

¹⁵ an kotu hna a thian bantukin nannih zong nan cawlcanghnâk vialte ah thiang tein um u.

¹⁶ Zeicatiah “Keimah ka thian bangin, nan nih zong thiang ve u,” tiah ṭial a si.

¹⁷ Cun thleidannâk um loin mikip tuahning cio i ceihpiaktu kha Pa ah nan i ngeih ahcun, hika i nan câm chung pauh cu Amah ṭihzahnâk he nung u.

¹⁸ Nan pupa hna sinin nan comi, san tlailo nan nunnâk chungin a rawk khomi sui le ngun men i tlanh nan si lo,

¹⁹ asinain sawi le mawhchiat awk um lomi tuufa thisen bantuk a sunglawimi Krih thisen in tlanhmi nan si kha nan hngalh.

²⁰ Amah cu vawlei serhlan in khaukhih a si cang, asinain hi ni hmadung bik ah hin nanmah caah langhter a si.

²¹ Thihnâk in a thawh tertu le sunparnâk petu Pathian cu nan zumh i nan zumhnâk le ruahchannâk cu Pathian ah a um.

²² Unau dawtnâk taktak kha ngei in, Thlarau thawngin biatak zum in, nan thlarau nan thianter cang caah, lungthin thiang te le biatak tein pakhat le pakhat i daw u,

²³ a rawk khomi thlaici ah si lo in, a nungmi Pathian bia le zungzal in a hmunmi a rawk kho lomi thlaici ah hrinṭhân mi nan si.

²⁴ Zeicatiah “Mi vialte hi ram bantuk men an si, An sunparnâk vialte zong ram pangpar bantuk men an si. Ram cu a uai i a par cu a tla.

²⁵ Asinain BAWIPA bia cu zungzal in a hmun.” Hihi thawngṭha in nan sinah chimmi bia cu a si.