1 KORIN 8 - Laibaibal Thiang (BSI)

¹ Milem biaknâk i pêkchanhmi kongah; kan dihlak in hngalhnâk kan ngei cio tiah kan hngalh. Hngalhnâk nih lung a puamter, asinain dawtnâk nih mi a ṭhatter.

² Mizei pauh nih thil hngal ngai i â ruah ahcun a hngalh ding zat cu a hngal rih lo, tinâk a si.

³ Asinain mizei pauh nih Pathian a dawt ahcun, Amah nih a hngalhmi a si.

⁴ Cucaah milem biaknâk sa ei kongah, vawlei ah hin milem vialte cu zeihmanh lo a sinâk le Pathian dah tilo cu a dang a um lo ning kan hngalh.

⁵ Zeitintiah vanah siseh, vawlei ah siseh, pathian tiah kawhmi tampi an um. (Cubantuk pathian le bawi cu tampi an si),

⁶ asinain kan caah Pathian pakhat lawnglawng Pa cu a um, Amah sin in zeizong vialte hi a chuak i kan nih zong Amah caah a ummi kan si, cun Bawipa pakhat Jesuh Krih lawnglawng a um, Amah thawngin zeizong vialte a um i Amah thawgin a nungmi kan si.

⁷ Asinain cubantuk hngalhnak cu mi vialte ah a um lo. micheukhat nih milem an hngalh ruangah milem biaknâk sa kha an ei peng i an chia ṭha hngalhnâk cu a ṭhawn lo caah thurter an si tawn.

⁸ Asinain eiding nih hin Pathian lung a kan tonter lai lo, kan ei lo tikah kan ṭhadeuh hlei lai lo, kan ei zongah kan ṭha deuh hlei lai lo.

⁹ Asinain i ralring u, zalong ngai i nan nun ah hin thazâng dermi caah dawnkhântu ah nan i cang tawn.

¹⁰ Zeitintiah nang hngalhnâk ngeitu kha, milem biaknâk hmun i rawl na dumlio mi nih an in hmuh i chiaṭha hngalhnâk lei i thazâng dermi a rak si ahcun milem biaknâk rawl ei kha ngamhnâk ah a hman sual lai.

¹¹ Na hngalhnâk ruangah thazâng a dermi na unau, a thihding Krih nih a thih piakmi kha a lo tlau sual lai?

¹² Cubantukin unau cungah palhnâk a tuah i chiaṭha hngalhnâk ah a dermi kha na fahter hna ahcun Krih cungah palhnâk a tuahtu ah nâ cang.

¹³ Cucaah eiding nih ka unau a tlukter ahcun, ka unau a tluk tinâk hngalo, sa ka ei ti lai lo.