1 KORIN 3 - Laibaibal Thiang (BSI)

¹ Cun unau hna, thlaraulei mi bangin nan sinah bia ka chim kho lo, thisa mi bangin, Krih ah ngakchia sem sin i bia chim bangin bia ka chim.

² Rawl si loin hnûk in kan cawn hna, a tu tiangin rawl nan ei kho rih lo,

³ zeitintiah thisa mi nan si peng ko rih. Zeitintiah hnachuahnâk, elhnialnâk, i ṭhennâk hna nan lakah a um tikah thisa mi, minung men men bantukin nan nung ko lo maw?

⁴ Pakhat nih, Paul bu ka si, a dang nih, Apollo bu ka si, nan ti chung pauh cu thisa mi nan si lo maw?

⁵ Paul cu ahodah a si, Apolo zong cu ahodah a si, rianṭuantu nan zumhmi kong an chimtu hna, cu hmanh cu Bawipa nih a pêkning cioin an si lo maw?

⁶ Kei nih ka bunh, Apollo nih ti a toih i Pathian nih a ṭhanter.

⁷ A ṭhan tertu Pathian dah ti lo cu, a bunhtu cu zeihmanh a si lo i ti a toihtu zong zeihmanh a si hlei lo.

⁸ A bunhtu le ti toihtu cu pumkhat an si, an ṭuanning cio in ṭuanman zong hmu ding an si.

⁹ Zeitintiah kannih cu Pathian rian ṭuanpitu kan si i nannih cu Pathian lo nan si. Pathian sakmi in zong nan si.

¹⁰ Pathian zângfahnâk pêk kan sining cio in innsak a thiam ngaimi bangin keinih a hram ka bunh, midangnih a cungah inn an sak. Cuticun a cungah inn a satu hna nih an sakning ah i ralring cio hna seh.

¹¹ Zeitintiah bunh ciami hram dah ti lo cu ahohmanh nih an bunh kho ti lo, cucu Jesuh Krih a si.

¹² Hrambunh mi cungah khan mi kip nih, sui, ngun, lungvar, thing, hnahchawl, capawl hna hmangin inn an sak ahcun,

¹³ mikip rianṭuan cu a fiang cang lai; zeitintiah cu Ni nih cun a fianter lai, zeicatiah mei in a langh lai caah, mei nih cun mikip rianṭuan cu zei a si kha a hniksak lai.

¹⁴ Mizei ṭuanmi zong a cung i sakmi kha a hmunh ahcun, cunih cun ṭuanman a hmuh lai.

¹⁵ Mizei ṭuanmi zong an kangh ahcun, cu nih cun ṭuanman a sung lai, amah tu cu mei chungah a lanmi bangin khamh a si lai.

¹⁶ Pathian ṭempal nan si le Pathian Thlarau nan chungah a um ti kha nan hngal lo maw?

¹⁷ Mizei pauh nih Pathian ṭempal cu a thûrter ahcun, Pathian nih a hrawk ve lai. Zeitintiah Pathian ṭempal cu a thiang i nanmah kha cu ṭempal cu nan si.

¹⁸ Ahohmanh mah i hleng hlah seh, nan lakah aho pauh kha vawlei thil i mifim ah â ruah ahcun, a fim khawh nâkhnga hrut hmasa seh.

¹⁹ Zeitintiah hi vawlei fimnâk hi Pathian ruahnâk ah hruh a si. “Mifim hna cu, an fim zernâk nih a foih hna,” tiah ṭial a si;

²⁰ cun, “BAWIPA nih mifim hna khuaruahnâk cu hman awk â tlak lo ti kha a hngalh,” tiah ṭial a si ṭhân.

²¹ Cucaah ahohmanh minung kha i hmaihngalpi hlah seh. Zeitintiah zeizong vialte hi nan ta a si.

²² Paul maw, Apollo maw, Peter maw, vawlei maw, nunnâk maw, thihnâk maw, thil um lio mi maw, thil um lai ding maw, a dih lakin nan ta an si.

²³ Nannih zong Krih ta nan si i Krih zong Pathian ta a si.