1 KORIN 14 - Laibaibal Thiang (BSI)

¹ Dawtnâk hi dawi ulaw, thlarau lei thilpêk zong duh u, a hlei in biaphuankhawhnâk hi duh u.

² Zeitintiah holh dangin bia a chimtu nih minung sinah chim loin Pathian sinah a chim, zeitintiah ahohmanh nih a chimmi cu an hngal lo nain thlarau ah biathli a chim.

³ Asinain biaphuangtu nih cun minunghna sersiamnâk le, thapêknâk le hnangamnâk bia kha a chim tawn.

⁴ Holh dangin biachimtu nih cun amah ṭhathnemnâk caah a chimmi a si, asinain biaphuanmi cu kawhhran ṭhathnemnâk caah a si.

⁵ Nan dihlak in holh dangin bia nan chim hi kan duhpiak hna, bia nanphuan khawhnâk hi kan duhpiak chinchin hna. biaphuangtu cu holh dangdang chimtunâk in a ngan deuh, kawhhran ṭhathnemnâk dingah cun lehpiak a herh tawn.

⁶ Atu ah hin ule nau hna, holh dangdang i bia chim awkah nan sinah ra ning law, langhnâk siseh, hngalhnâk siseh, biaphuan siseh, cawnpiak siseh ka chim lo ahcun zeidah ṭhathnemnâk kan pêk hna lai?

⁷ Nunnâk ngei lo, thanglawi le kiṭa te hna zong hi sullam ngei in a awnh lo ahcun an tum chan a ho nih dah an hngalh khawh lai?

⁸ Muko zong hi sullam ngeilo in an tum ahcun ahodah raldoh awkah â tim kho lai?

⁹ Cubangin nannih zong nih hngalh fawi dingin bia nan chim lo ahcun nan biachim zeitindah an hngalh khawh lai? Zeitintiah thlilak i biachim nan si ko lai.

¹⁰ Vawlei ah hin holh phunphun a um a si kho ko, sullam ngei lomi pakhat hmanh a um lo.

¹¹ Cucaah a holh sullam ka hngalh lo ahcun, kei hi a chimtu caah ramdang mi ka si lai i a chim tu zong ka caah ramdang mi a si lai.

¹² Thlarau lei thilpêk i ṭhahnem nan ngaih tuk caah kawhhran ṭhathnemnâk lei zong lam rak kawl chin u.

¹³ Cucaah holh dang ngeitu nih a lehkhawh nâkhnga thlacam seh.

¹⁴ Zeitintiah holh dang i thla ka cam ahcun, ka thlarau nih cun a cam ko nain ka hngalhnâk caah theipar a um lo.

¹⁵ A tlângkawmhnâk cu zeidah a si kun lai? Ka thlarau in thla ka cam lai i ka hngalhnâk zongin ka cam lai. Ka thlarau in hla ka sa lai i ka hngalhnâk zongin ka sa lai.

¹⁶ Culoahcun thlarau in thluachuah pe hmanh law, na chimmi zong a theihthiam lo i theithiamlonâk nih hmunhma a lang peng ko ahcun zeitindah lawmhnâk bia na chimmi ah, ‘Amen’ an pêk khawh lai.

¹⁷ Zeitintiah nang nih ṭha tein lawmhnâk bia na chim na in, midang nih an ṭhatpi lo.

¹⁸ Nannih vialte nakin holh dangdang i bia tamdeuh ka chim caah Pathian sinah lawmhnâk bia ka chim;

¹⁹ asinain kawhhran hna sin ah cun holh dang i kâ 10000 chimnâk in midang ka cawnpiak khawh nâkhnga, hngalhnâk i bia kâ 5 chim ka duh deuh.

²⁰ Ule nau hna, hngalhnâk ah ngakchia si hlah u, asinain sualnâk lei tu ah bawh te si ulaw hngalhnâk ah upa si u.

²¹ Nawlbia cauk ah, “Holh phundang a hmangmi hna hmurkâ in hi mi hna sinah bia ka chim lai, cu hnu hman ah anka ngai hlei lai lo, Bawipa nih a ti,” tiah ṭial a si.

²² Cucaah holh dangdang hna hi zumtu hna caah hmelchunhnâk si loin zumlotu hna caah a si deuh, asinain biaphuan tu cu zumlotu hna caah si loin zumtu hna caah a si.

²³ Cucaah kawhhran vialte hmunkhat ah nan i pumh i nan dihlak i holh dangdang i nan chim ahcun, a hngalthiam lomi le zumlotu ra sehlaw, an hrut cang an in ti hna lai lo maw?

²⁴ Asinain nan dihlak in bia nan phuantu a si ahcun zumlotu maw, a hngalh bal lomi zong ra sehlaw, nan dihlak tuahmi nih a sualnâk a hngalhter lai i amah i hmuhchuahnâk ah a hman ko lai.

²⁵ Cun a lungchung i biathli hna cu langhter dih a si lai, cuticun bawhbu in Pathian a biak lai i nan lakah Pathian a um tak tak tiah a ti khawh lai.

²⁶ Unau hna zeitindah a si rih lai? Nan i pumh tikah mikip nih thangṭhatnâk hla siseh, cawnpiaknâk siseh, holh dang siseh, langhnâk siseh, holh lehnâk siseh, nan ngeih tikah thil vialte hi ṭhathnemnâk ah tuah dih si hna seh.

²⁷ Holh dang i bia an chim ahcun, cân khat ah pahnih maw, pathum maw, si hna sehlaw pakhat nih let seh.

²⁸ Asinain a lettu an um lo ahcun kawhhran pumhnâk ah dai tein um i zuam seh, amah le Pathian sintu ah chim seh.

²⁹ Profet zong nih pahnih maw, pathum in maw chim hna seh law mi dang nih ṭha tein rak hlathlai hna seh.

³⁰ Asinain a pawng i a ṭhumi mi dang sinah langhnâk a um ahcun, a hmasa cu dai tein um seh.

³¹ Zeitintiah mi vialte nih an cawn i an hna a ngam khawh nâkhnga, pakhat hnu pakhat in phuang u.

³² Profet hna thlarau cu profet hna nawlin a um tawn.

³³ Zeitintiah Pathian cu buainâk Pathian a si lo, kawhhran mithiang vialte hna an i pawlkomh bantukin, daihnâk Pathian a si.

³⁴ Kawhhran hna chungah nu cu dai tein um seh, zeitintiah biachimnâk nawl pêk an si lo; nawlbia nih a chim bangin, nawlngai te in um ko hna seh.

³⁵ Cawn an duhmi thil a um ahcun, inn lei ah an va le hal ko hna seh; kawhhran i nu bia chim cu ningzak a si.

³⁶ Asiloah Pathian bia hi a hramthawk in nanmah i a chuakmi maw a si? Asiloah nan sin lawngah maw a phanh?

³⁷ Mi zeipauh nih profet ah maw, thlarau mi ngai ah maw â ruah ahcun, nan sin i ka ṭialmi hi Bawipa nawlpêk a si ti a hngalhpi awk a si.

³⁸ A hngalhthiam lo ahcun hngalthiam lo in rak um ko seh.

³⁹ Cucaah ule nau hna, biaphuangtu si hi duh ulaw, holh dangdang biachim zong dawn hlah u.

⁴⁰ Thil vialte hi dawh te le ningcang tein tuah si hna seh.