1 KORIN 13 - Laibaibal Thiang (BSI)

¹ Minung holh le vanmi holhhmanh in bia chim hmanh ning law, dawtnâk ka ngeih lo ahcun, darkhuang le sumsel thawng bantuk men ka si hnga.

² Biaphuan thilpêk co in, bia thli hna le hngalhnâk vialte ngei in, tlângṭhial khawhnâk zumhnâk vialte ngei hmanh ninglaw dawtnâk ka ngeih lo ahcun pakpalawng ka si lai.

³ Mi sifak cawmnâk ah ka ngeih vialte pe in, ka pum tiang khanghdingah pe hmanh ninglaw, dawtnâk ka ngeihlo ahcun ka ca hlawknâk zeihmanh a um lai lo.

⁴ Dawtnâk cu a lung a sau, zângfahnâk a ngei, dawtnâk cu a hnah a chuak lo, dawtnâk nih â zum lo i â uah fawn lo.

⁵ dawhcahlo in khua a sa lo, mah zawn lawng a ruat lo, a thinhung duh lo i thilṭha lo a ruat lo.

⁶ dinlonâk ah â lawm lo i biatak tu a lomhpi;

⁷ thil vialte a in i thil vialte a zumh, thil vialte â ruahchan i thil vialte a tuar tawn.

⁸ Dawtnâk cu a dongh bal lo. Chimchung bia a um ko lai nain an dongh lai, holh dangdang i holh a um ko lai nain an ngol lai, hngalhnâk hi um hmanhsehlaw lohter a si lai.

⁹ Zeitintiah a tling loin kan hngalh i a tling loin bia kan phuan tawn.

¹⁰ Asinain a tlingmi a phâk tikah a tling lomi cu hlawt an si ko lai.

¹¹ Ka ngakchiat lio ah ngakchia holh in ka holh, ngakchia hngalh in ka hngalh, ngakchia ruah in ka ruah tawn, atu ka upat hnu ah ngakchia thil hna cu ka hlawt cang.

¹² Zeitintiah atu ah cun thlalang ah fiang setsai loin kan hmuh, khi cân ah cun hmaitonh tein a si lai. Atu ah cun a cheuchum in ka hngalh, khi tikah cun hngalh ka si bantukin ka hngalh ve lai.

¹³ Cun zumhnâk, ruahchannâk, dawtnâk, hi pathum hna hi a hmun lai; asinain hi hna lakah a nganbik cu dawtnâk a si.