1 KORIN 12 - Laibaibal Thiang (BSI)

¹ Cubangin ule nau hna, thlaraulei thilpêk kong hi nan hngalh lo ka duh lo.

² Gentel mi nan si lio ah a holh kho hlei lo milem hna nih a hruai lengmang mi nan rak si.

³ Cucaah hihi kan theihter hna Pathian Thlarau in bia an chim tikah Jesuh cu chiatserhmi an ti bal lo, cun Thiang Thlarau dah tilo cun ahohmanh nih Jesuh cu Bawi a si an ti kho lo.

⁴ Thilpêk dangdang a um i Thlarau tu cu â khat ko.

⁵ Rianṭuannâk a phunphun a um i Bawipa cu â khat ko.

⁶ Cun rian ṭuanning a phunphun a um, asinain zeizong vialte i rianṭuantu Pathian cu â khat ko.

⁷ Asinain Thlarau hngalhternâk cu mi vialte ṭhatnâk ding caah mikip sinah pêk a si:

⁸ Mi pakhat sinah Thlarau in fimnâk bia pêk a si, midang sinah cu Thlarau ṭhiamṭhiam ah hngalhnâk pêk a si.

⁹ midang sinah cu Thlarau ṭhiamṭhiam ah zumhnâk pêk a si i midang sinah cu Thlarau ṭhiamṭhiam ah damter khawhnâk pêk a si;

¹⁰ midang sinah khuaruahhar tuahkhawhnâk pêk a si, midang sinah biaphuan khawhnâk pêk a si; midang sinah thlarau dik le dik lo thleidan khawhnâk pêk a si, midang sinah holh phundang dang i biachim khawhnâk pêk a si, midang sinah holh dangdang leh khawhnâk pêk a si.

¹¹ Asinain cu vialte cu Thlarau pakhat le â khatmi chungin mikip sinah a duh ningin a ṭuanmi a si.

¹² Zeitintiah taksa pumkhat ah nge tampi a um, a nge cu tampi asinain, taksa cu pakhat a si, cubangin Krih zong hi a si.

¹³ Zeitintiah Judah siseh, Grik siseh, sal siseh, zalongmi si hna seh Thlarau pakhat i baptisma in ter in kan um dih, cu Thlarau pakhat cu a kan dinter ciomi a si.

¹⁴ Zeitintiah taksa hi nge pakhat lawng si loin nge tampi a si.

¹⁵ Ke nih kut ka si lo ruangah pumah kâ tel lo, ti sehlaw, taksa i â tel lomi a si kho hlei lo.

¹⁶ Cun hnâ nih mit ka si lo ruangah taksa ah kâ tello ti sehlaw, cuthil ruangah taksa i â tellomi a si kho hlei lo.

¹⁷ Takpum hi mit lawngte siseh law, thawngtheihnâk kha khuazeiahdah a um kun lai? A dih lak in thawngtheihnâk si sehlaw, rim theihnâk cu khuazeiahdah a um kun lai?

¹⁸ Pathian nih nge vialte cu pum ah hin a duhnâk pauh ah a um termi a si.

¹⁹ Cuvialte cu nge khat lawng si sehlaw, pum cu khuazeiahdah a um kun lai?

²⁰ Nge tampi a um tak tak asinain pum cu pakhat lawng a si.

²¹ Mit nih kut sinah, “zeihmanhah kan herh lo,” a ti kho lo; asiloah lu zong nih ke sinah, “zeihmanhah kan herh lo,” a ti kho hlei lo.

²² Ti kho hrimhrim hlah, pum chung i zângdermi nge i a langmi hi santlai ngaimi a si kho ko.

²³ Cun santlai lo i kan ruahmi nge hna hi biapi ngai i kan ruah awk tu an si. Cucaah kan pum nge â dawh lomi hna nih â dawhmi hnipuan an herh deuh,

²⁴ â dawhmi kan pum nge hna cu thomh len an herh ti lo. Pathian nih dawhnâk ngei lo nge hna cu a thomh deuhmi an si,

²⁵ pum hi i ṭhen loin nge dangdang hna he pakhat le pakhat an i zohkhenh awk a si.

²⁶ Nge pakhat nih a tuarmi cu nge vialte nih an tuarpi ve. Nge pakhat thangṭhat a si ahcun a dang vialte nih an lawmh pi tawn.

²⁷ Cubangin nannih hi Krih pum cu nan si i pumpâk cio hi a nge cu nan si.

²⁸ Pathian nih a kawhhran ah hi hna hi a chiah hna, pakhatnâk ah, lamkaltu, pahnihnâk ah profet, pathumnâk ah cawnpiaktu, cu hnu ah khuaruahhar tuah kho tu, cuhnu ah damnâk thilpek ngeitu, mi bawm khotu, biaceihthiam mi, holh phun dangdang chim khotu hna an um.

²⁹ An dihlak in lamkaltu an si maw? An dihlak in profet an si maw? An dih lakin cawnpiaktu an si maw? An dihlak in khuaruahhar tuahtu an si maw?

³⁰ Andihlak in damnâk thilpêk ngei an si dih maw? An dihlakin holh dangdang in an chim maw? An dihlak in holh an let maw?

³¹ Asinain a ṭha tak takmi thilpêk ngeih kha duh ko u. Cun a ṭha bikmi lam kan hmuhsak hna lai.