1TIMOTE 6 - Laibaibal Thiang (BSI)

¹ Pathian min le a cawnpiaknâk thangchiat a si nâkhnga lo, sal hngawngkual banhmi ṭemchih sal vialte nih anmah le hotu hna cu zeizong kip ah thangṭhat tlâk an si zia hngal hna seh.

² An hotu le zumtu an si i unau an si ruangah zeirel loin um hna hlah seh, anmah ruang i ṭhathnemnâk hmutu an si caah zumtu le dawtmi an si caah rian ṭuanpiak hna seh. Cucu cawnpiak law tha pe hna.

³ Ahohmanh nih cawnpiaknâk dang a cawnpiak i a ngandammi bia, kan Bawipa Jesuh Krih bia hmanh pom lo in, Pathian upatnâk he â tlakmi bia hmanh a pom duh lo ahcun;

⁴ mi porhlaw, zeihmanh a hngal taktak lomi, i elhnial le buaibainâk chuahter zong poi a ti lomi a si, cubantuk mi hna nih an chuahter bikmi cu, hnahchuahnâk le buaibainâk le thangchiatnâk le a ṭha lomi i lunghrinh nâk le,

⁵ ruahnâk chia-kha le biatak pemh lo, a herh lo i bia el hmang le, biaknâk zong chawleh nâkah hman a ngamhmi an si. Cubantuk mi hna cu kawm hna hlah u.

⁶ Pathian-ṭihzahnâk hi lungtlinnâk he cun a hlawk ngaimi a si.

⁷ Zeitintiah vawilei ah hin zeihmanh kan luhpi lo i zeihmanh kan chuahpi lai lo.

⁸ Ei awk le fenhaih kan ngeih ahcun kan lung a tlin awk a si.

⁹ Asinain rum a duh tukmi hna cu tukforh nâk rap chungah an lut i duhnâk sual le hruhnâk thil nih mi a hrawh i chiatnâk le rawhralnâk sual ah mi a pilter tawn;

¹⁰ Zeitintiah phaisa duhtuk hi sualnâk vialte hram a si, cheukhat nih cucu an duh i zumhnâk an kaltak i anmah le anmah ngaihchiatnâk tam piin an i chunh tawn.

¹¹ Nang Pathian-mi cu thil hna cu zâmtâk, cuticun dinnâk le Pathian duhnâk, zumhnâk le dawtnâk, inkhawhnâk le nunmennâk kha dawi hna.

¹² Zumhnâk i raldohnâk ṭha kha doh in zungzal nunnâk kha i tlaih, cucu co ding i kawh na si, hngalhpitu tampi mit hmuh ah zumhnâk ṭha na phuan cang kha.

¹³ Zeizong vialte sinah nunnâk petu Pathian le Krih Jesuh, Pontius Pailat hmai i zumhnâk dik a ṭanhpengtu mithmuh ah nawl kan pêk,

¹⁴ kan Bawipa Jesuh Krih â langhṭhân hlan tiang hi nawlpêk hi mawhchiat awk le sawiawk umlo in rak kilveng,

¹⁵ thangṭhat awktlâk nawlngeitu lu, siangpahrang hna Siangpahrang, bawi hna Bawi nih Amah khiahmi cân ah a langhter lai,

¹⁶ Amah lawnglawng nih thihkhawhlonâk a ngei i naih khawhlomi ceu ah a um, ahohmanh nih an hmu bal lo i hmuhkhawh zong a si fawn lo, Amah sinah zungzal in upatnâk le ṭhawnnâk um ko seh. Amen.

¹⁷ Tuchan mirum hna nih an rumnâk kha porhlawtnâk i hmanglo ding le bochan awk a tlâk lomi chawva an i bochan nâkhnga lo le thil vialte kan i lawmhnâk dingah a kan petu Pathian kha i bochan dingin chimhring hna.

¹⁸ Thilṭha tuah hna seh, thilṭha tuahnâk ah rum hna seh, midang nih an ciangzar an tem ve nâkhnga nun siang hna seh,

¹⁹ zungzal nunnâk cu an i tlaih khawh nâkhnga le a ra laimi caah i ṭhumhnâk ṭha khong luaimai dingin tha pe hna.

²⁰ Aw Timote! nakut i chiahmi cu ṭha tein kilveng, Pathian-ṭihzahlonâk bia chim le ralchanhmi biafang hngalhnâk tiah silo ngaiin min an bunhmi kha hrial i zuam.

²¹ Cucu cheukhat nih kan ngeih tiah an i ruah i zumhnâk kha an pialtâk. Zângfahnâk na sinah um ko seh. Amen.