1TIMOTE 5 - Laibaibal Thiang (BSI)

¹ Putar kha sî hna hlah, pa bangin forh hna. Tlangval kha unau bangin zoh hna,

² pitar kha nu bangin zoh hna, ngaknu kha thiang tein farnu bangin zoh hna.

³ Nuhmei tak tak a simi kha upat hna.

⁴ Asinain tule fa a ngeimi a si ahcun an in chungah Pathian ṭihzah cawng hna sehlaw, anmah hringtu hna sinah ṭhatchuah cawng hna seh, cucu a ṭhami le Pathian caah cohlan awk a tlâkmi a si.

⁵ Nuhmei tak tak, amah lawng a ummi nih, Pathian lawng â bochan i chunzan hlan in thlacam le nawlnâk donghcat loin a tuah tawn.

⁶ Asinain nomhnâk lawng i a nungmi nuhmei cu a nun lio hmanhah a thimi a si.

⁷ Sawiawk um lo an si khawh nâkhnga cubangin nawl pe hna.

⁸ Asinain ahohmanh mah le sahlawh rualchan zeiah a rel lo i a umpimi chungkhar hmanh zei ah a rel lomi nih zumhnâk kha a hlawt i zum lotu nâkin a sual deuh.

⁹ Nuhmei kum 60 hmanh a tling lomi cu nuhmei ah relchih hlah, va pakhat a rak ngei cang i

¹⁰ ṭhatnâk tuahnâk kongah thangṭhatmi, fale zong tlamtling in a rak bawmtu le, thilṭha kip ṭhahnem ngai i tuahtu a si ahcun nuhmei ah ṭial khawh a si.

¹¹ Asinain ano deuhmi nuhmei hna cu ṭialchih hna hlah, zeitintiah an pumsa duhnâk i sum kho loin, Krih nâkin va-ngeih an duh tawn,

¹² hmaisa bik an zumhnâk kha an hlawt caah thiamlo an i coter tawn.

¹³ Cun daithlânnâk nih a zulh hna i innkip ah lêngin, thathut le mikong ceih hmanh i za loin, tuah loding tuah in, chim loding tiang an chim tawn.

¹⁴ Cucaah a no deuhmi nuhmei hna cu vâ ngei ṭhân ko seh, fale ngeiin, chungkhar zohkhenh sehlaw, a kan ralchanhtu hna sawinâk cân rem tuah hna hlah seh law ka duh.

¹⁵ Zeitintiah atu hmanh ah cheukhat cu Satan lei ah an pial cang.

¹⁶ Zumtu pa siseh, zumtu nu siseh, nuhmei umpi an ngeih ahcun cawmko hna seh, nuhmei taktak kha cawmken an si khawh nâkhnga kawhhran kha thilrit khinh hna hlah seh.

¹⁷ Kawhhran upa fel tein biaceih a thiammi le, a hlei in phungchim le cawnpiak lei i a ṭuanmi hna cu a let hnih i thangṭhat tlâk an si.

¹⁸ Zeitintiah Cathiang nih, “Cawtum nih facang a cil lioah a hmur ṭem hlah,” tiah a ti. “Rianṭuantu cu hlawh hmuh awk ah â tlâk,” tiah a ti ṭhân.

¹⁹ Kawhhran upa sualpuhnâk cu hngalhpitu pahnih an si lo le, pathum an si lo ahcun cohlang hlah.

²⁰ Sualnâk tuah a hmangmi cu midang hmuh ah chimhring hna, midang zong nih an ṭih ve nâkhnga.

²¹ Pathian le Bawipa Jesuh Krih le vanmi thiang hna hmaiah hi bia hna hi ruahning ngei cia lo le thleidan ngei lo tein fekte i dirpi dingin nawl kan pêk.

²² Khulrang in mi zei lucung hmanh ah na kut chuang hlah, midang sualnâk i hrawm loin, thiang tein i zohkhenh.

²³ Ti lawng ding loin, na pawfah le na derthawm deuh caah misur hang tlawmte tein rak ding.

²⁴ Cheu khat sualnâk cu alang cawlh i lehrulh an si cawlh ve. Cheukhat sualnâk cu a lang zau lomi zong a um.

²⁵ Cubantuk ṭhiamṭhiam in mi chekhat ṭhatnâk tuahmi cu a langh a fawi, chekhat tuahmi ṭhatnâk cu lang rih lo hmanhsehlaw thuh thai khawh a si lo.