1TIMOTE 4 - Laibaibal Thiang (BSI)

¹ Cân hmadung ahcun mi tampi nih zumhnâk hi an tluktâk lai i hlennâk thlarau le khuachia cawnpiaknâk lei ah an i mer lai tiah Thlarau nih fiang tein a chim,

² zer ngaiin lih anchim lai i an chiaṭha hngalhnâk cu thirlin dehmi bantuk an si lai,

³ ṭhit-umh an kham i biatak hngal i a zummi hna nih lawmhnâk bia chim i an cohlanmi Pathian sermi rawl ei hlah u tiah an kham hna.

⁴ Pathian nih a sermi vialte hi lawmhnâk bia chimnâk i cohlan a si ahcun an ṭha dih ko, duh lo ding zeihmanh a um lo,

⁵ zeitintiah Pathian bia le thlacamnâk in thianter a si cang.

⁶ Cu thil hna cu unau hna kha na cawnpiak ahcun, Jesuh Krih rianṭuantu ṭha, zumhnâk biatak le cawnpiaknâk dik atu tiang i na zulhmi bia i cawmkenmi na si lai.

⁷ Asinain Pathian-zeirellonâk le pitar hna tuanbia kha hlaw hna law Pathian-ṭihzahtu si dingin cawlcang.

⁸ Zeitintiah taksa zuam nâkin cawlcanghnâk zong hi san a tlai ve ko, asinain Pathian-ṭihzahtu sinâk i cawlcanghnâk nih cun atu nunchung le hmailei caah biakam a ngeih caah a lamkip in san a tlai.

⁹ Hihi zumh awktlâk le mi vialte caah cohlan awktlâk a si.

¹⁰ Zeitintiah Pathian nung cu kan zumh caah thaba ngai i kan ṭuan le chimchiatnâk kan inkhawhnâk zong hi a si, Amah cu mi vialte khamhtu a si, a hlei in a zumtu hna khamhtu a si.

¹¹ Cuhna cu nawl pein cawnpiak hna.

¹² Mino nasi ruangah ahohmanh nih in zomhtaih hna hlah seh, bia in siseh, nuncan in siseh, dawtnâk ah siseh, thlarau ah siseh, zumhnâk ah siseh, thiannâk ah siseh zumtu hna zohchunh awktlâk in nun i zuam.

¹³ Ka rat ṭhân hlân lo, rel, chim, cawnpiak kha uar chin chin.

¹⁴ Upa hna nih na lucung i kut chuangin an rak chimchung cang bangin thlarau thilpêk na hmuhmi kha zeirel loin um hlah.

¹⁵ Cuhna cu biatak tein ruat hna law, hmai na nawrning mi vialte nih an hmuh nâkhnga cu thil ah a dih um nâkin i hmang.

¹⁶ Nangmah lei le na cawnpiakning ah i ral ring, cucu i nunpi peng law, cu nih cun nangmah le na bia ngaitu kha na khamh hna lai.