1TIMOTE 3 - Laibaibal Thiang (BSI)

¹ Kawhhran hotu si a duhmi pauh cu ṭhatnâk tuah a duh timi bia hi zumhtlâk a si.

² Cuticun kawhhran hotu cu dotla, nupi pakhat ngei, â sumkhomi, ralringmi, nun can ṭha, mi conglomh thiam, cawnpiak thiam,

³ misur hang ding lomi, velhhmang lomi, phaisaduhtuk lomi, nunnemmi, elhnial hmang lomi, duhfâk lomi,

⁴ hmaizah awktlâk in inchungkhar le fale zohkhenhmi an si awk a si.

⁵ (zeitintiah mi nih amah inchungkhar hmanh a zohkhenh khawhlo ahcun Pathian kawhhran cu zeitindah a zohkhenh khawh lai?)

⁶ lungthlengka sihlah seh, culoahcun â porhlaw lai i Satan thiamloconâk ah a tlu sual lai.

⁷ Cuhleiah lênglei mi hna hmuhnâk zongah minṭhatnâk a ngeimi a si awk a si, culoahcun minchiatnâk ah tlu in Satan rap nih a foih sual lai.

⁸ Cubantukin kawhhran upa hna zong hmaizahmi an si hrimhrim awk a si, bia a duh tuk lomi, misurhang ram lomi, phaisa duhtuk lomi an si awk a si,

⁹ zumhnâk biathli chiaṭha hngalhnâk thiangin a tlaitu an si awk a si.

¹⁰ Cu zong cu hniksak an si hmasat awk a si, cuticun dotla an si ahcun upa rian ṭuan hna seh.

¹¹ Cubantukin an nupi le zong upatmi an si hrimhrim awk a si, kongceih le thangchiat a hmang lomi, â zuam khomi le, zeithil pauh ah zumhawk a tlâkmi an si awk a si.

¹² Kawhhran upa hna cu an inchungkhar le an fale zohkhenh a thiammi, nupi pakhat ngeimi an si awk a si.

¹³ Zeitintiah kawhhran upa ṭha tein a ṭuanmi cu dirhmun ṭha le fekmi cotu an si i Krih Jesuh chung i zumhnâk zongah ralṭhatnâk nganpi an ngei.

¹⁴ Na sinah ratzau kâ ruahchan nain hihi na sinah ka rak ṭial;

¹⁵ ka rauh deuh sual zongah Pathian chungkhar hna chungah khuasakning nan hngalh khawh nâkhnga ka ṭialmi a si. Pathian chungkhar hna cu Pathian nung kawhhran, biatak hrambunhnâk le suttung a si.

¹⁶ Pathianmisinâk biathli liannganning cu elkhawh a si lo. Pathian cu thisa ah â cang i Thlarau ah thiamcoter a si, vanmi nih an hmuh i Gentel mi hna sinah aupi le vawlei mi nih an zumh i sunparnâk ah kaipimi a si.