1TIMOTE 2 - Laibaibal Thiang (BSI)

¹ Cucaah a hmaisa bikah nawlnâk, thlacamnâk, midang ca i nawlnâk le lawmhnâk biachimnâk kha mi vialte caah tuah awkah kan forh,

² hnangam le dai te le Pathian upat le ṭihzah in khua kan sak khawh nâkhnga, bawi le nawlngeitu vialte caah thla cam u.

³ Zeitintiah hihi kan Khamhtu Pathian hmai ah a ṭha i cohlan awk a tlâkmi si,

⁴ Anih nih cun mi vialte khamh si hna seh law biatak hngal hna seh ti kha a duh.

⁵ Zeitintiah Pathian pakhat lawng a um i Pathian le minung karlak ah lamkaltu pakhat lawnglawng a um,

⁶ amah cu Minung mi vialte tlanhnâk ah a nunnâk a petu Krih Jesuh kha a si, cucu a cân te ah hngalh terin a um awk a si,

⁷ zeitintiah keimah zong cu bia chimtu le lamkaltu ah ruahmi ka si, Krih ah biatak ka chim i ka lih lo, zumhnâk le biatak ah Gentel mi hna cawnpiaktu ah ruahmi ka si.

⁸ Cucaah pa nih ka kip ah a thiangmi ankut thlir in thinhung lo le lunghring loin thla cam hna seh law ka duh,

⁹ cubantukin nu zong nih tluangtlam tein i ṭamh hna seh, luan tukin an sam phiar hna hlah seh, sui le lungvar le man fak tukmi hnipuan i hruk hna hlah seh.

¹⁰ Pathian a ṭanhtu nu hna nih a za tawkin thilṭha tuah in i ṭamh hna seh.

¹¹ Nu nih pumpeknâk he dai tein cawng hna seh.

¹² Pa cungah nawlngeih le cawnpiak cu ka onh hna lo, dai tein an um awk a si.

¹³ Zeitintiah Adam kha ser hmasat a si, cu hnu ah Evi kha ser a si.

¹⁴ Cun Adam kha hlen a si lo, Evi kha hlen a si i nawl buarnâk ah a tlu.

¹⁵ Asinain zumhnâk le dawtnâk, thianhlimnâk le sumkhawhnâk he a um peng ahcun fa hrin ruangah khamh in a um lai.