1TIMOTE 1 - Laibaibal Thiang (BSI)

¹ Paul, Pathian a kan khamhtu le kan i ruahchanmi Jesuh Krih nawlpêk bangin Jesuh Krih lamkaltu nih.

² Zumhnâk i ka fa taktak Timote sinah, Pathian kan Pa le kan Bawipa Jesuh Krih sin in zângfahnâk, vel le daihnâk um ko seh.

³ Masidonia ka kal lai i kan nawl bang khan Efesa khua ah um peng law, micheu khat nih cawnpiaknâk hmânlo an cawnpiakmi kha cawnpiak tilo dingin rak chim hna,

⁴ pupa hna min le tuanbia sawh sawh ruah le khah kha ngol hna seh, cu nih cun Pathian lei zumhnâkah ṭhathnemnâk zeihmanh a ngei lo, elhnialnâk men a chuahter.

⁵ Nawlpêk nih a tinhmi cu, zumhnâk taktak le chiaṭha hngalhnâk ṭha le lung thin thiangin a chuakmi dawtnâk hi a si,

⁶ cuthil hna cu kaltâk in mi cheukhat nih santlai lo bia sawhsawh an buaipi.

⁷ thiam ngaiin an chimmi nih zeidah a sawh i sullam zeidah a ngeih ti zong ruat loin nawlbia cawnpiaktu si kha an duh.

⁸ Asi nawlbia hi minih tling tein a hman ahcun a ṭha ti kha kan hngalh,

⁹ hihi hngal hna seh, nawlbia hi miṭha caah ser a si lo, nawlbia zeiah a rel lomi, nawlbia ral chanh i a nungmi, Pathian-zeiaharellomi, misual, a thiang lomi, biaknâk zeiaharellomi, nu le pa thattu, lainawng,

¹⁰ nupa sualnâk tuah a hmangmi, tawkâ hor, minung fir a hmangmi, lih chimmi, a deu in chiatserh i biakam a hmangmi, cawnpiaknâk hmân ralchanhtu,

¹¹ thangṭhattlâk Pathian thawngṭha sunparnâk kan sin i chiahmi ralchanhtu hna caah ser a si.

¹² Hi rian ṭuan kho i a ka sertu le zumhtlâk i a ka ruattu Krih Jesuh kan Bawipa sinah lawmhnâk bia ka chim.

¹³ Hlanah thangchiattu le serhsattu le mi sawksâmtu ka rak sinain zumlonâk le hngallo buin ka rak tuahmi a si caah velhngeihnâk ka rak conâk hi a si.

¹⁴ Cun kan Bawipa zângfahnâk tamzia cu Krih Jesuh ah a ummi zumhnâk le dawtnâk thawngin tamtuk in a liam in a liam.

¹⁵ Krih Jesuh cu misual hna khamh dingah vawlei ah a ra, ti hi zumh awk a tlâkmi le cohlan awk a tlâkmi a si, an lakah a sual bik ka si.

¹⁶ Asinain hi ruangah hin velngeihnâk ka hmuh hi a si, cucu Jesuh Krih nih ka cungah a lungsaunâk vialte a langhter hmasa i atu thawkin zungzal nunnâk co awkah a zum hngami hna caah zohchunh awk a si nâkhnga.

¹⁷ Zungzal Siangpahrang, a thi kho lomi, hmuh khawh lomi, amah lawng a fimmi Pathian sinah zungzal in zungzal tiang upatnâk le sunparnâk um ko seh. Amen.

¹⁸ Ka fapa Timote, hlan i na kong an rak chim chungmi bangin um awkah raldohnâk ṭha kha na doh khawh nâkhnga, cu ṭuanvo cu na cungah ka chiah.

¹⁹ Zumhnâk le chiaṭha hngalhnâk thiang kha i tlaih peng, ceukhat nih cucu an namnul i tilawng a kuaimi bangin an zumhnâk kha a kuai tawn.

²⁰ Cuhna lak ah Humanias le Aleksandria an i tel, Pathian thangchiat a poining an hngalh khawh nâkhnga annih cu Satan sinah ka pêk hna.