1THESALON 2 - Laibaibal Thiang (BSI)

¹ Ule nau hna nansin kan rat kha pakpalawng a si lo zia nanmah hrimhrim nih nan hngalh.

² Asinain khahlan ah khan temtuarnâk kan rak in cang, Filipi khua ah diriam ngai i tukvelhnâk kan rak ton, kha tluk i dohdalnâk lakah Pathian thawngṭha phuang dingin kan Pathian ah kan ral a ṭhatning zong nan hngalh.

³ Zeitintiah kan chimmi hi a dik lomi le a thûrmi le hlennâk in a chuakmi an si lo.

⁴ Asinain thawngṭha chim rian hi Pathian nih pêk awk tlak i a kan ruah bantukin kan chim tikah minung lawmhternâk men ah si loin, kan lungthin a hniksaktu Pathian lawmh terin kan chim tawn.

⁵ Zeitintiah nan hngalh bantukin, zeitikhmanhah hngawng cung bia le hakkauh thuhnawhnâk bia kan hman lo ning a kan hngalhpitu cu Pathian a si.

⁶ Midang ca thilrit pe kho tiangin Krih lamkaltusinâk kan ngei ko nain, nansin in siseh midang sin in siseh, aho sin hmanh in thangṭhatnâk kan kawl bal lo.

⁷ Fa a pommi nu nih a fa a dawt bantukin, nan lakah nunnem ngai i kan um kha.

⁸ Cuticun hitlukin kan in ngaih hna ruangah hin, Pathian thawngṭha cawnpiak lawng hmanh hi kan i lung si lo, kan ca-ah ngaih um tukmi nan si caah, kan nunnâk tiang pêk kan in duh hna.

⁹ Zeitintiah u le nau hna kan tha a batning le kan harnâk nan hngalh, nan cungah thilrit tuahpiak kan duh lo ruangah chun zan hlan i rianṭuan buin Pathian thawngṭha bia kan in chimh hna.

¹⁰ Nan lak i zumtu hna sinah sawiawk um loin dik ngai le i pumpe dih in kan umning kha a kan hngalhpitu nan si i Pathian zong nih a kan hngalhpi;

¹¹ pa nih a fale cung i a tuah tawn bangin tha kan in pêk hna, nan hna kan ngamter, cubantuk i tuah cio dingin ṭuanvo zong kan in khinh cang hna,

¹² cucu a pennâk le sunparnâk chungah an kotu hna Pathian mi si awktlâk in nan nun khawh nâkhnga caah a si.

¹³ Hiruangah hin ngol loin Pathian sinah lawmhnâk bia kan chim, zeicatiah kan sin in nan theihmi Pathian bia nan cohlan tikah minung bia bangin nan cohlang lo, i biatak ngaiin Pathian bia bangin nan cohlan, cucu a zumtu sinah santlai ngaiin rian a ṭuntu hi a si.

¹⁴ Zeitintiah nannih ule nau hna, Judia ram i Pathian kawhhran hna, Krih Jesuh i a ummi hna zohchunhmi nan si. Zeitintiah annih nih Judah mi hna sinin an tuar bantukin nannih zong nih â tluk bakin nan rammi hna sinin nan tuar ve,

¹⁵ cu hna nih Bawipa Jesuh le anmah profet zong an thah hna i kannih zong ankan serhsat. Pathian an lawmhter lo i mi vialte dohkalh leiin khua an sa,

¹⁶ Gentel mi hna khamh an si khawh nâkhnga an sin i phungchim an kan thlauh, an sualnâk nih a donghnâk a phân, asinain a donghnâk ahcun thinhunnâk cu anmah cung li la ah a phân.

¹⁷ Ule nau hna, nanmah he lungthin lei ah si loin, taksa in cân tawite chung kan i ṭhen i nan mui hmuh ṭhân duh in kan i zuam zungzal.

¹⁸ Cucaah keimah Paul zong telhchih in nan sinah voi tam nawn rat kan i tim nain Satan nih a kan kham.

¹⁹ Zeitintiah kan i ruahchannâk, kan i lawmhnâk le kan bawiluchin ding cu zeidah a si hnga? kan Bawipa Jesuh Krih a rat ṭhan tikah nanmah hi nan si hnga lo maw?

²⁰ Zeitintiah nanmah hi kan sunparnâk le kan i lawmhnâk nan si.