1JOHAN 5 - Laibaibal Thiang (BSI)

¹ Jesuh hi Krih a si tiah zumtu cu Pathian hrin a si; a hringtu a dawmi pauh nih, a hrinmi zong a dawt tawn.

² Pathian fa le hna kan dawt hna tiah kan hngalh khawhnâk cu, Pathian kan dawt i a nawlpêkmi kan zulh ah hin a si.

³ Zeitintiah hihi Pathian dawtnâk cu a si, a nawlpêkmi kan zulhmi hi, a nawlpêkmi cu zulh har a si lo.

⁴ Zeitintiah Pathian hrinmi pauh nih vawlei hi an tei. Kan zumhnâk hi vawlei a teitu teinâk cu a si.

⁵ Jesuh hi Pathian Fapa a si tiah a zumtu dah ti lo cu ahonihdah vawlei hi an tei bal?

⁶ Hipa hi a si ti le thisen i a rami cu Jesuh Krih hi: ti lawngah si loin ti le thisen ah a si. Hngalhpitu cu Thlarau hi a si. Thlarau cu biatak a si caah.

⁷ Vanah hngalhpitu pathum an um, Pa, Bia, le Thiang Thlarau an si; hi pathum hna hi pumkhat an si.

⁸ Cun vawlei ah hin hngalhpitu pathum an um, Thlarau, ti le thisen an si, hi hna pathum hi pakhat bangin an i ruang dih.

⁹ Minung hngalhpinâk hmanh kan cohlan ahcun, Pathian hngalhpinâk cu a lianngan deuh. Pathian hngalhpinâk cu, a Fapa kong a hngalhtermi hi a si.

¹⁰ Pathian Fapa zumtu nih amah ah hngalhnâk a ngei. Pathian a zumlotu nih Amah cu lihchim ah a canter, a chan cu Pathian nih a Fapa kong i a hngalhtermi a zumh lo caah a si.

¹¹ Hihi hngalhtermi cu a si. Pathian nih zungzal nunnâk a kan pêk i cu nunnâk cu a Fapa ah a um.

¹² Fapa a ngeitu nih nunnâk cu a ngei: Pathian Fapa a ngeilotu nih nunnâk cu a ngei lo.

¹³ Nannih Pathian Fapa min a zumtu hna sinah, zungzal nunnâk kan ngei tiah nan i hngalh khawh nâkhnga hihi ka ṭial, cun Pathian Fapa min hi nan zumh peng khawh nâkhnga ca zongah a si.

¹⁴ Cubangin hihi Amah cung i kan ralṭhatnâk cu a si, Amah duh ningin kan halmi pauh, a kan ngaihpiakmi hi.

¹⁵ Cun kan halmi pauh a kan ngaihpiak tiah kan hngalh ahcun, a sin i kan halmi cu kan hmuh cang ti zong kan hngalh.

¹⁶ Mizei pauh nih a unau thihnâk tlâk a si lomi sualnâk a tuah tawnmi hmu sehlaw, a hal piak lai i Pathian nih thihnâk tlak a si lomi sualnâk a tuahtu cu nunnâk a pêk lai. Thihnâk tlak sual zong a um. Cu kongah cun nan hal piak lai ka timi a si lo.

¹⁷ Dinlonâk vialte hi sual a si. Cun thihnâk tlak a si lomi sual zong a um.

¹⁸ Mizei pauh Pathian hrin a simi nih sualnâk an tuah peng lo ti kan hngalh. Pathian Hrin nih khan amah cu a kilven i misual pa nih cun a tongh hmanh a tawng kho lo.

¹⁹ Pathian ta kan si ti le, vawlei pumpi hi misuaksual pa kut ah a um ti kha kan hngalh.

²⁰ Pathian Fapa cu a ra i a dikmi Amah kha kan hngalh khawhnâk dingah hngalhthiamnâk a kan pêk cang ti kha kan hngalh. Kannih cu a Fapa Jesuh Krih a dikmi Amah ah khan kan um. Hihi Pathian dik le zungzal nunnâk a si.

²¹ Nau le hna, milem in i himter u. A men.